fazaon se guzarta ja raha hun

fazāoñ se guzartā jā rahā huuñ

ḳhalāoñ meñ bikhartā jā rahā huuñ

maiñ registān meñ baiThā huuñ lekin

samundar meñ utartā jā rahā huuñ

zamāna lamha lamha jī rahā hai

maiñ lamha lamha martā jā rahā huuñ

vo jitne duur hote jā rahe haiñ

maiñ utnā hī sañvartā jā rahā huuñ

chalā huuñ apne se do haat karne

magar ḳhud se bhī Dartā jā rahā huuñ

maiñ nuqta ban ke ik markaz pe yaaro

na jaane kyuuñ Thahartā jā rahā huuñ

miTāne par bhī maiñ urdu kī mānind

sañvartā aur nikhartā jā rahā huuñ

maiñ kaalī jhiil meñ Duubā thā ḳhud hī

magar ḳhud hī ubhartā jā rahā huuñ

maiñ 'qaisar' apnī āñkhoñ se Tapak kar

kisī dil meñ utartā jā rahā huuñ

fazaon se guzarta ja raha hun

KHalaon mein bikharta ja raha hun

main registan mein baiTha hun lekin

samundar mein utarta ja raha hun

zamana lamha lamha ji raha hai

main lamha lamha marta ja raha hun

wo jitne dur hote ja rahe hain

main utna hi sanwarta ja raha hun

chala hun apne se do hat karne

magar KHud se bhi Darta ja raha hun

main nuqta ban ke ek markaz pe yaro

na jaane kyun Thaharta ja raha hun

miTane par bhi main urdu ki manind

sanwarta aur nikharta ja raha hun

main kali jhil mein Duba tha KHud hi

magar KHud hi ubharta ja raha hun

main 'qaisar' apni aankhon se Tapak kar

kisi dil mein utarta ja raha hun