nakaami-e-dil kulsum kabhi taqdir ko apni roi nahin

nākāmī-e-dil 'kulsūm' kabhī taqdīr ko apnī roī nahīñ

qurbān maiñ apnī himmat ke sab so.e magar ye soī nahīñ

ai sub.h-e-qayāmat kyā kahnā is vāda-e-dīd ke maiñ qurbāñ

vo parde se ab nikle haiñ jab dekhne vaalā koī nahīñ

giryāñ hai abhī tak chashm-e-falak bulbul bhī barābar rotī hai

barbādī-e-gulshan ke ġham meñ shabnam hī akelī roī nahīñ

tū apne ko ḳhud pyārā hai yuuñ pyaar tujhe sansār se hai

varna kisī kā chāhne vaalā duniyā bhar meñ koī nahīñ

Dar hai ye mujhe ki ḳhūn-e-nāhaq rañg na laa.e mahshar meñ

ḳhuun meñ Duubī āstīñ apnī us ne abhī tak dhoī nahīñ

ai nāqa-e-lailā parda-nashīñ phir najd ke zarre raqs meñ haiñ

manzil-e-husn to sāmne hai kyā ishq kī manzil koī nahīñ

jo honā thā vo ho hī chukā ab kahne se kyā hāsil hai

ye vaqt-e-duā hai ai nāseh ye vaqt-e-nasīhat-goī nahīñ

ḳhūn-e-anādil dauḌ rahā hai lāla-o-gul kī rag rag meñ

phir bhī saare baaġh meñ ham-āhañg anādil koī nahīñ

vo husn kā manshā kyā samjhe vo rasm-e-mohabbat kyā jaane

daulat-e-sabr-o-sukūn-e-dil ishq meñ jis ne khoī nahīñ

mañjdhār se kashtī paar huī sāhil pe jab aa.ī Duub ga.ī

taqdīr to sab kī sāthī thī taqdīr kā sāthī koī nahīñ

nakaami-e-dil 'kulsum' kabhi taqdir ko apni roi nahin

qurban main apni himmat ke sab soe magar ye soi nahin

ai subh-e-qayamat kya kahna is wada-e-did ke main qurban

wo parde se ab nikle hain jab dekhne wala koi nahin

giryan hai abhi tak chashm-e-falak bulbul bhi barabar roti hai

barbaadi-e-gulshan ke gham mein shabnam hi akeli roi nahin

tu apne ko KHud pyara hai yun pyar tujhe sansar se hai

warna kisi ka chahne wala duniya bhar mein koi nahin

Dar hai ye mujhe ki KHun-e-nahaq rang na lae mahshar mein

KHun mein Dubi aastin apni us ne abhi tak dhoi nahin

ai naqa-e-laila parda-nashin phir najd ke zarre raqs mein hain

manzil-e-husn to samne hai kya ishq ki manzil koi nahin

jo hona tha wo ho hi chuka ab kahne se kya hasil hai

ye waqt-e-dua hai ai naseh ye waqt-e-nasihat-goi nahin

KHun-e-anadil dauD raha hai lala-o-gul ki rag rag mein

phir bhi sare bagh mein ham-ahang anadil koi nahin

wo husn ka mansha kya samjhe wo rasm-e-mohabbat kya jaane

daulat-e-sabr-o-sukun-e-dil ishq mein jis ne khoi nahin

manjdhaar se kashti par hui sahil pe jab aai Dub gai

taqdir to sab ki sathi thi taqdir ka sathi koi nahin