rehl pe hathon ki rakh kar main ruKH ka sahifa sochun hun

rehl pe hāthoñ kī rakh kar maiñ ruḳh kā sahīfa sochūñ huuñ

aur agar kuchh ban nahīñ paḌtā chupke chupke ro luuñ huuñ

motī ashk sitāre aañsū zardāroñ kī tashbīhāt

bhuuk meñ palkoñ par goyā maiñ jvaar ke daane tolūñ huuñ

jab koī zardār mile hai raah meñ apnī chaal meñ mast

patthar se kyā Takrānā maiñ ek kināre ho luuñ huuñ

nanhe nanhe hāthoñ meñ jab bhiik kā kaasa dekhūñ maiñ

der talak maiñ haath sameTe ḳhālī jeb TaTolūñ huuñ

sarsoñ ke khaliyān pe qābiz añdhiyāroñ ke shākī haiñ

maiñ to lahū ke diip jalā kar chain se shab bhar so luuñ huuñ

mun.im jab tahqīr se dekhe mere sūkhe sūkhe haath

poñchh ke peshānī se pasīna apne haath bhigo luuñ huuñ

sher kahāñ ye dil ke darvāze par halkī dastak hai

ek kanī almās kī jis se patthar meñ dar kholūñ huuñ

rehl pe hathon ki rakh kar main ruKH ka sahifa sochun hun

aur agar kuchh ban nahin paDta chupke chupke ro lun hun

moti ashk sitare aansu zardaron ki tashbihat

bhuk mein palkon par goya main jwar ke dane tolun hun

jab koi zardar mile hai rah mein apni chaal mein mast

patthar se kya Takrana main ek kinare ho lun hun

nanhe nanhe hathon mein jab bhik ka kasa dekhun main

der talak main hath sameTe KHali jeb TaTolun hun

sarson ke khaliyan pe qabiz andhiyaron ke shaki hain

main to lahu ke dip jala kar chain se shab bhar so lun hun

munim jab tahqir se dekhe mere sukhe sukhe hath

ponchh ke peshani se pasina apne hath bhigo lun hun

sher kahan ye dil ke darwaze par halki dastak hai

ek kani almas ki jis se patthar mein dar kholun hun