fikr-e-tamir-e-ashiyan bhi hai

fikr-e-tāmīr-e-āshiyāñ bhī hai

ḳhauf-e-be-mehri-e-ḳhizāñ bhī hai

ḳhaak bhī uḌ rahī hai rastoñ meñ

āmad-e-sub.h kā samāñ bhī hai

rañg bhī uḌ rahā hai phūloñ kā

ġhunche ġhunche sharar-fishāñ bhī hai

os bhī hai kahīñ kahīñ larzāñ

bazm-e-anjum dhuāñ dhuāñ bhī hai

kuchh to mausam bhī hai ḳhayāl-añgez

kuchh tabī.at mirī ravāñ bhī hai

kuchh tirā husn bhī hai hosh-rubā

kuchh mirī shoḳhī-e-bayāñ bhī hai

har nafas shauq bhī hai manzil kā

har qadam yād-e-raftagāñ bhī hai

vaj.h-e-taskīñ bhī hai ḳhayāl us kā

had se baḌh jaa.e to girāñ bhī hai

zindagī jis ke dam se hai 'nāsir'

yaad us kī azāb-e-jāñ bhī hai

fikr-e-tamir-e-ashiyan bhi hai

KHauf-e-be-mehri-e-KHizan bhi hai

KHak bhi uD rahi hai raston mein

aamad-e-subh ka saman bhi hai

rang bhi uD raha hai phulon ka

ghunche ghunche sharar-fishan bhi hai

os bhi hai kahin kahin larzan

bazm-e-anjum dhuan dhuan bhi hai

kuchh to mausam bhi hai KHayal-angez

kuchh tabiat meri rawan bhi hai

kuchh tera husn bhi hai hosh-ruba

kuchh meri shoKHi-e-bayan bhi hai

har nafas shauq bhi hai manzil ka

har qadam yaad-e-raftagan bhi hai

wajh-e-taskin bhi hai KHayal us ka

had se baDh jae to giran bhi hai

zindagi jis ke dam se hai 'nasir'

yaad us ki azab-e-jaan bhi hai