فکر کو شہ پر جنوں کو نقش پا مل جائے گا

فکر کو شہ پر جنوں کو نقش پا مل جائے گا

عزم محکم لے کے اٹھو راستہ مل جائے گا

حادثوں کا کیا ہے یہ تو زندگی کے ساتھ ہیں

ایک سے بچ کر چلو گے دوسرا مل جائے گا

دوش پر رکھے ہوئے سر کی کوئی قیمت نہیں

سر اٹھا کر چل کوئی قاتل ادا مل جائے گا

کون ہے میرے سوا آسودۂ غم شہر میں

جس سے پوچھو گے مرے گھر کا پتا مل جائے گا

درد کا احساس بھی اس میں ہو یہ لازم نہیں

دل تو ہر پہلو میں اک ٹوٹا ہوا مل جائے گا

مرحلے ایسے بھی آئیں گے کبھی سوچا نہ تھا

رہزنوں سے خود امیر قافلہ مل جائے گا

چہرہ چہرہ دیکھ لے گا اپنے اپنے خد و خال

ایک دن ہر آدمی کو آئنہ مل جائے گا

منتظر ہے چشم ساقی جنبش لب کی عزیزؔ

بے طلب کیا تجھ کو برباد انا مل جائے گا