firaq ek nai surat nikal to sakti hai

'firāq' ik na.ī sūrat nikal to saktī hai

ba-qaul us aañkh ke duniyā badal to saktī hai

tire ḳhayāl ko kuchh chup sī lag ga.ī varna

kahāniyoñ se shab-e-ġham bahal to saktī hai

urūs-e-dahr chale khā ke Thokareñ lekin

qadam qadam pe javānī ubal to saktī hai

palaT paḌe na kahīñ us nigāh kā jaadū

ki Duub kar ye chhurī kuchh uchhal to saktī hai

bujhe hue nahīñ itne bujhe hue dil bhī

fasurdagī meñ tabī.at machal to saktī hai

agar tū chāhe to ġham vaale shādmāñ ho jaa.eñ

nigāh-e-yār ye hasrat nikal to saktī hai

ab itnī band nahīñ ġham-kadoñ kī bhī rāheñ

havā-e-kūcha-e-mahbūb chal to saktī hai

kaḌe haiñ kos bahut manzil-e-mohabbat ke

mile na chhāñv magar dhuup Dhal to saktī hai

hayāt lau tah-e-dāmān-e-marg de uTThī

havā kī raah meñ ye sham.a jal to saktī hai

kuchh aur maslahat-e-jazb-e-ishq hai varna

kisī se chhuT ke tabī.at sambhal to saktī hai

azal se soī hai taqdīr-e-ishq maut kī niiñd

agar jagā.iye karvaT badal to saktī hai

ġham-e-zamāna-o-soz-e-nihāñ kī aañch to de

agar na TuuTe ye zanjīr gal to saktī hai

sharīk-e-sharm-o-hayā kuchh hai bad-gumānī-e-husn

nazar uThā ye jhijak sī nikal to saktī hai

kabhī vo mil na sakegī maiñ ye nahīñ kahtā

vo aañkh aañkh meñ paḌ kar badal to saktī hai

badaltā jaa.e ġham-e-rozgār kā markaz

ye chaal gardish-e-ayyām chal to saktī hai

vo be-niyāz sahī dil matā-e-hech sahī

magar kisī kī javānī machal to saktī hai

tirī nigāh sahārā na de to baat hai aur

ki girte girte bhī duniyā sambhal to saktī hai

ye zor-o-shor salāmat tirī javānī bhī

ba-qaul ishq ke sāñche meñ Dhal to saktī hai

sunā hai barf ke TukḌe haiñ dil hasīnoñ ke

kuchh aañch pā ke ye chāñdī pighal to saktī hai

hañsī hañsī meñ lahū thūkte haiñ dil vaale

ye sar-zamīn magar la.al ugal to saktī hai

jo tū ne tark-e-mohabbat ko ahl-e-dil se kahā

hazār narm ho ye baat khal to saktī hai

are vo maut ho yā zindagī mohabbat par

na kuchh sahī kaf-e-afsos mal to saktī hai

haiñ jis ke bal pe khaḌe sarkashoñ ko vo dhartī

agar kuchal nahīñ saktī nigal to saktī hai

huī hai garm lahu pī ke ishq kī talvār

yuuñ hī jilā.e jā ye shāḳh phal to saktī hai

guzar rahī hai dabe paañv ishq kī devī

subuk-ravī se jahāñ ko masal to saktī hai

hayāt se nigah-e-vāpsīñ hai kuchh mānūs

mire ḳhayāl se āñkhoñ meñ pal to saktī hai

na bhūlnā ye hai tāḳhīr husn kī tāḳhīr

'firāq' aa.ī huī maut Tal to saktī hai

'firaq' ek nai surat nikal to sakti hai

ba-qaul us aankh ke duniya badal to sakti hai

tere KHayal ko kuchh chup si lag gai warna

kahaniyon se shab-e-gham bahal to sakti hai

urus-e-dahr chale kha ke Thokaren lekin

qadam qadam pe jawani ubal to sakti hai

palaT paDe na kahin us nigah ka jadu

ki Dub kar ye chhuri kuchh uchhal to sakti hai

bujhe hue nahin itne bujhe hue dil bhi

fasurdagi mein tabiat machal to sakti hai

agar tu chahe to gham wale shadman ho jaen

nigah-e-yar ye hasrat nikal to sakti hai

ab itni band nahin gham-kadon ki bhi rahen

hawa-e-kucha-e-mahbub chal to sakti hai

kaDe hain kos bahut manzil-e-mohabbat ke

mile na chhanw magar dhup Dhal to sakti hai

hayat lau tah-e-daman-e-marg de uTThi

hawa ki rah mein ye shama jal to sakti hai

kuchh aur maslahat-e-jazb-e-ishq hai warna

kisi se chhuT ke tabiat sambhal to sakti hai

azal se soi hai taqdir-e-ishq maut ki nind

agar jagaiye karwaT badal to sakti hai

gham-e-zamana-o-soz-e-nihan ki aanch to de

agar na TuTe ye zanjir gal to sakti hai

sharik-e-sharm-o-haya kuchh hai bad-gumani-e-husn

nazar uTha ye jhijak si nikal to sakti hai

kabhi wo mil na sakegi main ye nahin kahta

wo aankh aankh mein paD kar badal to sakti hai

badalta jae gham-e-rozgar ka markaz

ye chaal gardish-e-ayyam chal to sakti hai

wo be-niyaz sahi dil mata-e-hech sahi

magar kisi ki jawani machal to sakti hai

teri nigah sahaara na de to baat hai aur

ki girte girte bhi duniya sambhal to sakti hai

ye zor-o-shor salamat teri jawani bhi

ba-qaul ishq ke sanche mein Dhal to sakti hai

suna hai barf ke TukDe hain dil hasinon ke

kuchh aanch pa ke ye chandi pighal to sakti hai

hansi hansi mein lahu thukte hain dil wale

ye sar-zamin magar lal ugal to sakti hai

jo tu ne tark-e-mohabbat ko ahl-e-dil se kaha

hazar narm ho ye baat khal to sakti hai

are wo maut ho ya zindagi mohabbat par

na kuchh sahi kaf-e-afsos mal to sakti hai

hain jis ke bal pe khaDe sarkashon ko wo dharti

agar kuchal nahin sakti nigal to sakti hai

hui hai garm lahu pi ke ishq ki talwar

yun hi jilae ja ye shaKH phal to sakti hai

guzar rahi hai dabe panw ishq ki dewi

subuk-rawi se jahan ko masal to sakti hai

hayat se nigah-e-wapsin hai kuchh manus

mere KHayal se aankhon mein pal to sakti hai

na bhulna ye hai taKHir husn ki taKHir

'firaq' aai hui maut Tal to sakti hai