fitrat-e-dil ki mehrbani hai

fitrat-e-dil kī mehrbānī hai

maiñ huuñ yā ġham kī tarjumānī hai

ġham meñ bhī dil ko shādmānī hai

un kī shafqat hai mehrbānī hai

har ḳhushī jin pe maiñ ne qurbāñ kī

kyoñ unheñ shauq-e-jāñ-sitānī hai

jo bhī hai dāstān-e-ahl-e-vafā

dard-o-ālām kī kahānī hai

ham kahāñ qābil-e-ġham-e-dil the

ik sitamgar kī mehrbānī hai

dil kā ronā hai aur kuchh bhī nahīñ

haa.e kyā chiiz ye javānī hai

soz ġham dard rañj hijr malāl

dil pe kis kis kī mehrbānī hai

kis qadar hai ‘ajīb sūrat-e-hāl

ġham hai dil ko na shādmānī hai

ḳhāmushī meñ hai lutf-e-goyā.ī

ye bhī ik shān-e-be-zabānī hai

ek mauhūm sī tamannā kī

dil kī duniyā pe hukmrānī hai

mujh se milte ho be-niyāzāna

ye bhī andāz-e-dil-sitānī hai

daaġh dil kā kahīñ na miT jaa.e

ye tumhārī hī ik nishānī hai

ai mohabbat ye kyā kiyā tū ne

bad-gumānī hī bad-gumānī hai

zindagī bhar fareb khaa.e haiñ

dostoñ kī ye mehrbānī hai

ham sar-e-rāh luT ga.e yaksar

rahbaroñ kī ye mehrbānī hai

ai 'kañval' intihā-e-shauq na pūchh

rāt-din shaġhl-e-naġhma-ḳhvānī hai

fitrat-e-dil ki mehrbani hai

main hun ya gham ki tarjumani hai

gham mein bhi dil ko shadmani hai

un ki shafqat hai mehrbani hai

har KHushi jin pe main ne qurban ki

kyon unhen shauq-e-jaan-sitani hai

jo bhi hai dastan-e-ahl-e-wafa

dard-o-alam ki kahani hai

hum kahan qabil-e-gham-e-dil the

ek sitamgar ki mehrbani hai

dil ka rona hai aur kuchh bhi nahin

hae kya chiz ye jawani hai

soz gham dard ranj hijr malal

dil pe kis kis ki mehrbani hai

kis qadar hai ‘ajib surat-e-haal

gham hai dil ko na shadmani hai

KHamushi mein hai lutf-e-goyai

ye bhi ek shan-e-be-zabani hai

ek mauhum si tamanna ki

dil ki duniya pe hukmrani hai

mujh se milte ho be-niyazana

ye bhi andaz-e-dil-sitani hai

dagh dil ka kahin na miT jae

ye tumhaari hi ek nishani hai

ai mohabbat ye kya kiya tu ne

bad-gumani hi bad-gumani hai

zindagi bhar fareb khae hain

doston ki ye mehrbani hai

hum sar-e-rah luT gae yaksar

rahbaron ki ye mehrbani hai

ai 'kanwal' intiha-e-shauq na puchh

raat-din shaghl-e-naghma-KHwani hai