fitrat-e-ishq gunahgar hui jati hai

fitrat-e-ishq gunahgār huī jaatī hai

fikr-e-duniyā bhī ġham-e-yār huī jaatī hai

kitnā nāzuk hai ḳhudā rakkhe mohabbat kā mizāj

ab tasallī bhī dil-āzār huī jaatī hai

jab se chhīnī hai tirī yaad ne niiñd ā.ankhoñ kī

dil kī jo his hai vo bedār huī jaatī hai

aah pābandī-e-ādāb-e-mohabbat tauba

ThanDī har saañs gunāh-gār huī jaatī hai

chhū liyā arsh ko mansūr kī añgḌā.ī ne

sāf-goī rasan-o-dār huī jaatī hai

har tajallī hai tire sāmne sharminda sī

chāñdnī sāya-e-dīvār huī jaatī hai

shukriya shoḳhī-e-husn-e-pas-e-parda kā 'sirāj'

aañkh be-dekhe gunāh-gār huī jaatī hai

fitrat-e-ishq gunahgar hui jati hai

fikr-e-duniya bhi gham-e-yar hui jati hai

kitna nazuk hai KHuda rakkhe mohabbat ka mizaj

ab tasalli bhi dil-azar hui jati hai

jab se chhini hai teri yaad ne nind aaankhon ki

dil ki jo his hai wo bedar hui jati hai

aah pabandi-e-adab-e-mohabbat tauba

ThanDi har sans gunah-gar hui jati hai

chhu liya arsh ko mansur ki angDai ne

saf-goi rasan-o-dar hui jati hai

har tajalli hai tere samne sharminda si

chandni saya-e-diwar hui jati hai

shukriya shoKHi-e-husn-e-pas-e-parda ka 'siraj'

aankh be-dekhe gunah-gar hui jati hai