wo siwa yaad aae bhulane ke baad

vo sivā yaad aa.e bhulāne ke ba.ad

zindagī baḌh ga.ī zahr khāne ke ba.ad

dil sulagtā rahā āshiyāne ke ba.ad

aag ThanDī huī ik zamāne ke ba.ad

raushnī ke liye dil jalānā paḌā

aisī zulmat baḌhī tere jaane ke ba.ad

jab na kuchh ban paḌā arz-e-ġham kā javāb

vo ḳhafā ho ga.e muskurāne ke ba.ad

dushmanoñ se pashemān honā paḌā

dostoñ kā ḳhulūs āzmāne ke ba.ad

rañj had se guzar ke ḳhushī ban gayā

ho ga.e paar ham Duub jaane ke ba.ad

baḳhsh de yā rab ahl-e-havas ko bahisht

mujh ko kyā chāhiye tujh ko paane ke ba.ad

kaise kaise gile yaad aa.e 'ḳhumār'

un ke aane se qabl un ke jaane ke ba.ad

wo siwa yaad aae bhulane ke baad

zindagi baDh gai zahr khane ke baad

dil sulagta raha aashiyane ke baad

aag ThanDi hui ek zamane ke baad

raushni ke liye dil jalana paDa

aisi zulmat baDhi tere jaane ke baad

jab na kuchh ban paDa arz-e-gham ka jawab

wo KHafa ho gae muskurane ke baad

dushmanon se pasheman hona paDa

doston ka KHulus aazmane ke baad

ranj had se guzar ke KHushi ban gaya

ho gae par hum Dub jaane ke baad

baKHsh de ya rab ahl-e-hawas ko bahisht

mujh ko kya chahiye tujh ko pane ke baad

kaise kaise gile yaad aae 'KHumar'

un ke aane se qabl un ke jaane ke baad