fuzul shai hun mera ehtiram mat karna

fuzūl shai huuñ mirā ehtirām mat karnā

faqat duā mujhe denā salām mat karnā

kahīñ ruke to na phir tum ko rāsta degī

ye zindagī bhī safar hai qayām mat karnā

vo āshnā nahīñ ḳhvāboñ kī ma.anaviyyat kā

hamāre ḳhvāb abhī us ke naam mat karnā

zabān muñh meñ hai tār-e-gunah kī sūrat

tumhārā hukm bajā hai kalām mat karnā

mirā vajūd ki hai dāna-e-qanā.at sā

maiñ ik faqīr parinda huuñ daam mat karnā

ye baat sach hai yahāñ guftugū avaam se hai

magar adab ko guzargāh-e-ām mat karnā

'fazā' charāġh-o-shafaq donoñ rahzanoñ kī matā.a

jo ḳhair chāho to raste meñ shaam mat karnā

fuzul shai hun mera ehtiram mat karna

faqat dua mujhe dena salam mat karna

kahin ruke to na phir tum ko rasta degi

ye zindagi bhi safar hai qayam mat karna

wo aashna nahin KHwabon ki manawiyyat ka

hamare KHwab abhi us ke nam mat karna

zaban munh mein hai tar-e-gunah ki surat

tumhaara hukm baja hai kalam mat karna

mera wajud ki hai dana-e-qanaat sa

main ek faqir parinda hun dam mat karna

ye baat sach hai yahan guftugu awam se hai

magar adab ko guzargah-e-am mat karna

'faza' charagh-o-shafaq donon rahzanon ki mataa

jo KHair chaho to raste mein sham mat karna