ghafil hun teri yaad se aisa to nahin hai

ġhāfil huuñ tirī yaad se aisā to nahīñ hai

har-vaqt mire dil meñ tirī yaad makīñ hai

duniyā-e-mohabbat baḌī dilkash hai hasīñ hai

har ek ko raas aa.e zarūrī to nahīñ hai

maanā ki zamāne kā har ik naqsh hasīñ hai

is par bhī zamāne meñ koī tujh sā nahīñ hai

ik arz-e-tamannā ke sivā ham ne kiyā kyā

kis baat pe vo sho.ala-badan chīñ-ba-jabīñ hai

kyā ḳhaak ho mere dil-e-betāb kā darmāñ

jab tujh pe tirī chashm-e-tavajjoh hī nahīñ hai

dil meñ hai magar jazba-e-iḳhlās-o-mohabbat

vo ḳhud hī khiñche ā.eñge ye merā yaqīñ hai

kyā kahiye mohabbat meñ ajab haal hai apnā

nazreñ haiñ kahīñ aur to dil aur kahīñ hai

rah rah ke khaTaktā hai jo har saañs meñ paiham

siine meñ koī ḳhaar hai yā qalb-e-hazīñ hai

iqrār-e-vafā kar bhī chukīñ terī nigāheñ

afsos tire lab pe magar phir bhī nahīñ hai

is but kā koī ahd bhī iifā nahīñ hotā

kyā is kā yaqīñ jis kā na īmāñ hai na diiñ hai

kyā turfa-qayāmat hai mirī vaj.h-e-tabāhī

vo pūchhte haiñ aur mujhe yaad nahīñ hai

sharminda-e-ehsāñ maiñ nahīñ rāh-numā kā

'āsī' mirā rahbar to mirā azm-o-yaqīñ hai

ghafil hun teri yaad se aisa to nahin hai

har-waqt mere dil mein teri yaad makin hai

duniya-e-mohabbat baDi dilkash hai hasin hai

har ek ko ras aae zaruri to nahin hai

mana ki zamane ka har ek naqsh hasin hai

is par bhi zamane mein koi tujh sa nahin hai

ek arz-e-tamanna ke siwa hum ne kiya kya

kis baat pe wo shoala-badan chin-ba-jabin hai

kya KHak ho mere dil-e-betab ka darman

jab tujh pe teri chashm-e-tawajjoh hi nahin hai

dil mein hai magar jazba-e-iKHlas-o-mohabbat

wo KHud hi khinche aaenge ye mera yaqin hai

kya kahiye mohabbat mein ajab haal hai apna

nazren hain kahin aur to dil aur kahin hai

rah rah ke khaTakta hai jo har sans mein paiham

sine mein koi KHar hai ya qalb-e-hazin hai

iqrar-e-wafa kar bhi chukin teri nigahen

afsos tere lab pe magar phir bhi nahin hai

is but ka koi ahd bhi ifa nahin hota

kya is ka yaqin jis ka na iman hai na din hai

kya turfa-qayamat hai meri wajh-e-tabahi

wo puchhte hain aur mujhe yaad nahin hai

sharminda-e-ehsan main nahin rah-numa ka

'asi' mera rahbar to mera azm-o-yaqin hai