ghaalib-o-yagana se log bhi the jab tanha

'ġhālib'-o-'yagāna' se log bhī the jab tanhā

ham se tai na hogī kyā manzil-e-adab tanhā

fikr-e-anjuman kis ko kaisī anjuman pyāre

apnā apnā ġham sab kā sochiye to sab tanhā

sun rakho zamāne kī kal zabān par hogī

ham jo baat karte haiñ aaj zer-e-lab tanhā

apnī rahnumā.ī meñ kī hai zindagī ham ne

saath kaun thā pahle ho ga.e jo ab tanhā

mehr-o-māh kī sūrat muskurā ke guzre haiñ

ḳhāk-dān-e-tīra se ham bhī roz-o-shab tanhā

kitne log aa baiThe paas mehrbāñ ho kar

ham ne ḳhud ko paayā hai thoḌī der jab tanhā

yaad bhī hai saath un kī aur ġham-e-zamāna bhī

zindagī meñ ai 'jālib' ham hue haiñ kab tanhā

'ghaalib'-o-'yagana' se log bhi the jab tanha

hum se tai na hogi kya manzil-e-adab tanha

fikr-e-anjuman kis ko kaisi anjuman pyare

apna apna gham sab ka sochiye to sab tanha

sun rakho zamane ki kal zaban par hogi

hum jo baat karte hain aaj zer-e-lab tanha

apni rahnumai mein ki hai zindagi hum ne

sath kaun tha pahle ho gae jo ab tanha

mehr-o-mah ki surat muskura ke guzre hain

KHak-dan-e-tira se hum bhi roz-o-shab tanha

kitne log aa baiThe pas mehrban ho kar

hum ne KHud ko paya hai thoDi der jab tanha

yaad bhi hai sath un ki aur gham-e-zamana bhi

zindagi mein ai 'jalib' hum hue hain kab tanha