ghaaliban mere alawa koi guzra bhi nahin

ġhāliban mere alāva koī guzrā bhī nahīñ

terī manzil meñ kahīñ naqsh-e-kaf-e-pā bhī nahīñ

aap kī raah meñ duniyā nazar aatī hai mujhe

ik qadam aur jo baḌh jā.ūñ to duniyā bhī nahīñ

aap kyā soch ke ġham apnā atā karte haiñ

himmat-e-dil to ba-qadr-e-ġham-e-duniyā bhī nahīñ

tum to be-misl ho tauhīd-e-mohabbat kī qasam

tum sā kyā hogā jahāñ meñ koī mujh sā bhī nahīñ

hashr kī bhiiḌ meñ ek ek kā muñh taktā huuñ

is bharī-bazm meñ ik jānñe vaalā bhī nahīñ

husn ne da.avat-e-nazzāra har ik rañg se dī

ishq ne aañkh uThā kar kabhī dekhā bhī nahīñ

ek tum ho ki tamannāoñ ke dushman hī rahe

ek maiñ huuñ mujhe ehsās-e-tamannā bhī nahīñ

juzv-e-dil ban ke samātī hai mohabbat dil meñ

ye vo kāñTā hai ki hai aur khaTaktā bhī nahīñ

yaad aatī hai 'sabā' be-vatnoñ kī kis ko

mujh ko yārān-e-vatan se koī shikva bhī nahīñ

ghaaliban mere alawa koi guzra bhi nahin

teri manzil mein kahin naqsh-e-kaf-e-pa bhi nahin

aap ki rah mein duniya nazar aati hai mujhe

ek qadam aur jo baDh jaun to duniya bhi nahin

aap kya soch ke gham apna ata karte hain

himmat-e-dil to ba-qadr-e-gham-e-duniya bhi nahin

tum to be-misl ho tauhid-e-mohabbat ki qasam

tum sa kya hoga jahan mein koi mujh sa bhi nahin

hashr ki bhiD mein ek ek ka munh takta hun

is bhari-bazm mein ek jaanne wala bhi nahin

husn ne dawat-e-nazzara har ek rang se di

ishq ne aankh uTha kar kabhi dekha bhi nahin

ek tum ho ki tamannaon ke dushman hi rahe

ek main hun mujhe ehsas-e-tamanna bhi nahin

juzw-e-dil ban ke samati hai mohabbat dil mein

ye wo kanTa hai ki hai aur khaTakta bhi nahin

yaad aati hai 'saba' be-watnon ki kis ko

mujh ko yaran-e-watan se koi shikwa bhi nahin