gate hue peDon ki KHunuk chhanw se aage nikal aae

gaate hue peḌoñ kī ḳhunuk chhāñv se aage nikal aa.e

ham dhuup meñ jalne ko tire gaañv se aage nikal aa.e

aisā bhī to mumkin hai mile be-talab ik muzhda-e-manzil

ham apnī du'āoñ se tamannāoñ se aage nikal aa.e

kahte haiñ ki jismoñ ko ik rūh-e-muqaddas kī du'ā hai

vo jism ki jo apne thake paañv se aage nikal aa.e

thoḌā sā bhī jin logoñ ko irfān-e-mazāhib thā vo bach kar

ka.aboñ se shivāloñ se kalīsāoñ se aage nikal aa.e

the ham bhī gunahgār par ik zāhid makkār kī zid

bāzār meñ biktī huī salmāoñ se aage nikal aa.e

shahroñ ke makīnoñ se milī jab hameñ vahshat kī zamānat

ham sī ke garebānoñ ko sahrāoñ se aage nikal aa.e

bantī rahī ik duniyā 'qatīl' apnī ḳharīdār magar ham

yūsuf na bane aur zuleḳhāoñ se aage nikal aa.e

gate hue peDon ki KHunuk chhanw se aage nikal aae

hum dhup mein jalne ko tere ganw se aage nikal aae

aisa bhi to mumkin hai mile be-talab ek muzhda-e-manzil

hum apni du'aon se tamannaon se aage nikal aae

kahte hain ki jismon ko ek ruh-e-muqaddas ki du'a hai

wo jism ki jo apne thake panw se aage nikal aae

thoDa sa bhi jin logon ko irfan-e-mazahib tha wo bach kar

kabon se shiwalon se kalisaon se aage nikal aae

the hum bhi gunahgar par ek zahid makkar ki zid

bazar mein bikti hui salmaon se aage nikal aae

shahron ke makinon se mili jab hamein wahshat ki zamanat

hum si ke garebanon ko sahraon se aage nikal aae

banti rahi ek duniya 'qatil' apni KHaridar magar hum

yusuf na bane aur zuleKHaon se aage nikal aae