gada dast-e-ahl-e-karam dekhte hain

gadā dast-e-ahl-e-karam dekhte haiñ

ham apnā hī dam aur qadam dekhte haiñ

na dekhā jo kuchh jaam meñ jam ne apne

so yak qatra-e-mai meñ ham dekhte haiñ

ye ranjish meñ ham ko hai be-iḳhtiyārī

tujhe terī khā kar qasam dekhte haiñ

ġharaz kufr se kuchh na diiñ se hai matlab

tamāshā-e-dair-o-haram dekhte haiñ

hubāb-e-lab-e-jū haiñ ai bāġhbāñ ham

chaman ko tire koī dam dekhte haiñ

navishte ko mere miTāte haiñ ro ro

malā.ek jo lauh o qalam dekhte haiñ

miTā jaa.e hai harf harf āñsuoñ se

jo naama use kar raqam dekhte haiñ

akaḌ se nahīñ kaam sumbul kī ham ko

kisī zulf kā pech o ḳham dekhte haiñ

ḳhudā dushmanoñ ko na vo kuchh dikhā.e

jo kuchh dost se apne ham dekhte haiñ

sitam se kiyā tū ne ham ko jo ḳhūgar

karam se tire ham sitam dekhte haiñ

magar tujh se ranjīda-ḳhātir hai 'saudā'

use tere kūche meñ kam dekhte haiñ

gada dast-e-ahl-e-karam dekhte hain

hum apna hi dam aur qadam dekhte hain

na dekha jo kuchh jam mein jam ne apne

so yak qatra-e-mai mein hum dekhte hain

ye ranjish mein hum ko hai be-iKHtiyari

tujhe teri kha kar qasam dekhte hain

gharaz kufr se kuchh na din se hai matlab

tamasha-e-dair-o-haram dekhte hain

hubab-e-lab-e-ju hain ai baghban hum

chaman ko tere koi dam dekhte hain

nawishte ko mere miTate hain ro ro

malaek jo lauh o qalam dekhte hain

miTa jae hai harf harf aansuon se

jo nama use kar raqam dekhte hain

akaD se nahin kaam sumbul ki hum ko

kisi zulf ka pech o KHam dekhte hain

KHuda dushmanon ko na wo kuchh dikhae

jo kuchh dost se apne hum dekhte hain

sitam se kiya tu ne hum ko jo KHugar

karam se tere hum sitam dekhte hain

magar tujh se ranjida-KHatir hai 'sauda'

use tere kuche mein kam dekhte hain