gae mausamon ko bhula denge hum

ga.e mausamoñ ko bhulā deñge ham

khañDar kā diyā bhī bujhā deñge ham

abhī sirf chehroñ ko paḌhte raho

kahānī kisī din sunā deñge ham

dabī aag sunte haiñ bujhtī nahīñ

tujhe ḳhāk-e-dil ab uḌā deñge ham

zamāne hamārā suḳhan paas rakh

tujhe aur ġhurbat meñ kyā deñge ham

miTe habs-e-jāñ koī lab to hile

uḌī baat ko ab havā deñge ham

nazar ham pe rakhtā hai sahrā 'suhail'

ye Dar hai kahīñ gul khilā deñge ham

gae mausamon ko bhula denge hum

khanDar ka diya bhi bujha denge hum

abhi sirf chehron ko paDhte raho

kahani kisi din suna denge hum

dabi aag sunte hain bujhti nahin

tujhe KHak-e-dil ab uDa denge hum

zamane hamara suKHan pas rakh

tujhe aur ghurbat mein kya denge hum

miTe habs-e-jaan koi lab to hile

uDi baat ko ab hawa denge hum

nazar hum pe rakhta hai sahra 'suhail'

ye Dar hai kahin gul khila denge hum