ghaflat mein farq apni tujh bin kabhu na aaya

ġhaflat meñ farq apnī tujh bin kabhū na aayā

ham aap ke na aa.e jab tak ki tū na aayā

saaqī ne jām-e-mai to shab pai-ba-pai diyā par

niyyat bharī na apnī jab tak subū na aayā

kotāh hai nihāyat dast-e-duā hamārā

dāman asar kā jā kar ik baar chhū na aayā

āshiq ko tere kal se thī jāñ-kanī kī hālat

sab dekhne ko aa.e allāh tū na aayā

phūñkā bhī tūr-o-vādī ba.az ai 'ḳhalīq' lekin

apnī sharāratoñ se vo sho.ala-ḳhū na aayā

ghaflat mein farq apni tujh bin kabhu na aaya

hum aap ke na aae jab tak ki tu na aaya

saqi ne jam-e-mai to shab pai-ba-pai diya par

niyyat bhari na apni jab tak subu na aaya

kotah hai nihayat dast-e-dua hamara

daman asar ka ja kar ek bar chhu na aaya

aashiq ko tere kal se thi jaan-kani ki haalat

sab dekhne ko aae allah tu na aaya

phunka bhi tur-o-wadi baz ai 'KHaliq' lekin

apni shararaton se wo shoala-KHu na aaya