ghaflat mein hui auqat basar ai umr-e-gurezan kuchh na kiya

ġhaflat meñ huī auqāt basar ai umr-e-gurezāñ kuchh na kiyā

sab chalne ke the sāmān baham chalne hī kā sāmāñ kuchh na kiyā

vaa.iz ne bhare ḳham chuur kiye tar kar dī zamīñ ai pīr-e-muġhāñ

zālim ne zarā bhī terā lihāz ai rahbar-e-īmāñ kuchh na kiyā

a.amāl kī zishtī kā badlā maiñ kah nahīñ saktā kyā miltā

bhejā bhī agar dozaḳh meñ tujhe ai sāhab-e-īmāñ kuchh na kiyā

mai piine kā dil meñ josh na thā zāhir kī talab thī hosh meñ aa

saaqī ne milāyā zahar agar ai munkir-e-ehsāñ kuchh na kiyā

maanā ki baḌī saffāk hai tū bil-farz baḌī jallād hai tū

maiñ jiitā rahā tā-sub.h agar to ai shab-e-hijrāñ kuchh na kiyā

taklīf kisī ko gar pahūñchī tū is meñ takalluf kyā niklā

hairān jo rakhā qātil ko to ai shab-e-hijrāñ kuchh na kiyā

ulTā na irāq-o-shām-o-halab duniyā na huī vīrān to kyā

jal-thal na lahū se to ne bharā to ḳhūn-e-musalmāñ kuchh na kiyā

suntā huuñ adū ko ḳhaak kiyā miTTī meñ milāyā ghar us kā

phūñkā na jalā kar mujh ko agar tū ai shab-e-hijrāñ kuchh na kiyā

kyā jī ke karūñgā maiñ tanhā yaañ taab kahāñ baaqī dil ko

be-maut ke ab maarā na mujhe to dāġh-e-azīzāñ kuchh na kiyā

jumbish se tirī maqtal hotā ik aan meñ dasht-e-karb-o-balā

ushshāq kī bebākī kā evaz ai abrū-e-barrāñ kuchh na kiyā

ai nañg-e-jahāñ ai 'shād' batā kuchh sharm bhī tujh ko hai ki nahīñ

ai jehl-e-murakkab ai haivāñ ai be-ḳhabar insāñ kuchh na kiyā

ghaflat mein hui auqat basar ai umr-e-gurezan kuchh na kiya

sab chalne ke the saman baham chalne hi ka saman kuchh na kiya

waiz ne bhare KHam chur kiye tar kar di zamin ai pir-e-mughan

zalim ne zara bhi tera lihaz ai rahbar-e-iman kuchh na kiya

aamal ki zishti ka badla main kah nahin sakta kya milta

bheja bhi agar dozaKH mein tujhe ai sahab-e-iman kuchh na kiya

mai pine ka dil mein josh na tha zahir ki talab thi hosh mein aa

saqi ne milaya zahar agar ai munkir-e-ehsan kuchh na kiya

mana ki baDi saffak hai tu bil-farz baDi jallad hai tu

main jita raha ta-subh agar to ai shab-e-hijran kuchh na kiya

taklif kisi ko gar pahunchi tu is mein takalluf kya nikla

hairan jo rakha qatil ko to ai shab-e-hijran kuchh na kiya

ulTa na iraq-o-sham-o-halab duniya na hui viran to kya

jal-thal na lahu se to ne bhara to KHun-e-musalman kuchh na kiya

sunta hun adu ko KHak kiya miTTi mein milaya ghar us ka

phunka na jala kar mujh ko agar tu ai shab-e-hijran kuchh na kiya

kya ji ke karunga main tanha yan tab kahan baqi dil ko

be-maut ke ab mara na mujhe to dagh-e-azizan kuchh na kiya

jumbish se teri maqtal hota ek aan mein dasht-e-karb-o-bala

ushshaq ki bebaki ka ewaz ai abru-e-barran kuchh na kiya

ai nang-e-jahan ai 'shad' bata kuchh sharm bhi tujh ko hai ki nahin

ai jehl-e-murakkab ai haiwan ai be-KHabar insan kuchh na kiya