gahraiyon mein dil ki utarta chala gaya

gahrā.iyoñ meñ dil kī utartā chalā gayā

ġham tā-dam-e-hayāt nikhartā chalā gayā

yādoñ kī vādiyoñ meñ jahāñ rakh diye qadam

har naqsh zindagī kā ubhartā chalā gayā

lutf-o-karam kā daur bhī aayā to is tarah

jhoñkā havā kā jaise guzartā chalā gayā

sun lī agar kisī kī kabhī āh-e-dil-ḳharāsh

nashtar sā ek dil meñ utartā chalā gayā

āġhāz-e-ishq kī faqat itnī sī yaad hai

āñkhoñ se koī dil meñ utartā chalā gayā

ham bhī rāh-e-hayāt meñ chalte rahe magar

saaya sā jaise koī guzartā chalā gayā

dekhī nigāh-e-shauq meñ jab ġham kī dāstāñ

andāz-e-husn aur nikhartā chalā gayā

vo rafta rafta zindagī se duur kyā hue

ehsās zindagī kā bhī martā chalā gayā

duniyā-e-iltifāt simaTtī chalī ga.ī

shīrāza-e-hayāt bikhartā chalā gayā

gahraiyon mein dil ki utarta chala gaya

gham ta-dam-e-hayat nikharta chala gaya

yaadon ki wadiyon mein jahan rakh diye qadam

har naqsh zindagi ka ubharta chala gaya

lutf-o-karam ka daur bhi aaya to is tarah

jhonka hawa ka jaise guzarta chala gaya

sun li agar kisi ki kabhi aah-e-dil-KHarash

nashtar sa ek dil mein utarta chala gaya

aaghaz-e-ishq ki faqat itni si yaad hai

aankhon se koi dil mein utarta chala gaya

hum bhi rah-e-hayat mein chalte rahe magar

saya sa jaise koi guzarta chala gaya

dekhi nigah-e-shauq mein jab gham ki dastan

andaz-e-husn aur nikharta chala gaya

wo rafta rafta zindagi se dur kya hue

ehsas zindagi ka bhi marta chala gaya

duniya-e-iltifat simaTti chali gai

shiraaza-e-hayat bikharta chala gaya