gai hai sham abhi zaKHm zaKHm kar ke mujhe

ga.ī hai shaam abhī zaḳhm zaḳhm kar ke mujhe

ab aur ḳhvāb nahīñ dekhne sahar ke mujhe

huuñ mutma.in ki huuñ āsūda-e-ġham-e-jānāñ

majāl kyā ki ḳhushī dekhe aañkh bhar ke mujhe

kahāñ milegī bhalā is sitamgarī kī misāl

taras bhī khātā hai mujh par tabāh kar ke mujhe

maiñ rah na jā.ūñ kahīñ terā ā.īna ban kar

ye dekhnā nahīñ achchhā sañvar sañvar ke mujhe

in āñsuoñ se bhalā merā kyā bhalā hogā

vo mere ba.ad jo royā bhī yaad kar ke mujhe

khulā bhī ab dar-e-zindāñ to jā.ūñgā maiñ kahāñ

ki rāste hī nahīñ yaad apne ghar ke mujhe

hunar-varī faqat ezāz-baḳhsh kab hai 'vaqār'

chukāne paḌte haiñ kuchh qarz bhī hunar ke mujhe

gai hai sham abhi zaKHm zaKHm kar ke mujhe

ab aur KHwab nahin dekhne sahar ke mujhe

hun mutmain ki hun aasuda-e-gham-e-jaanan

majal kya ki KHushi dekhe aankh bhar ke mujhe

kahan milegi bhala is sitamgari ki misal

taras bhi khata hai mujh par tabah kar ke mujhe

main rah na jaun kahin tera aaina ban kar

ye dekhna nahin achchha sanwar sanwar ke mujhe

in aansuon se bhala mera kya bhala hoga

wo mere baad jo roya bhi yaad kar ke mujhe

khula bhi ab dar-e-zindan to jaunga main kahan

ki raste hi nahin yaad apne ghar ke mujhe

hunar-wari faqat ezaz-baKHsh kab hai 'waqar'

chukane paDte hain kuchh qarz bhi hunar ke mujhe