gai ruton ki rafaqaton mein tumhein milungi

ga.ī rutoñ kī rafāqatoñ meñ tumheñ milūñgī

maiñ chāhatoñ kī riyāzatoñ meñ tumheñ milūñgī

tum apnī manzil ke rāstoñ meñ jo dekh paao

to rāstoñ kī sa.ūbatoñ meñ tumheñ milūñgī

nahīñ milūñgī kisī bhī vasl-āshnā safar meñ

maiñ hijr-mausam kī shiddatoñ meñ tumheñ milūñgī

ki maiñ ne chāhat ko bhī aqīda banā liyā hai

agar milī to aqīdatoñ meñ tumheñ milūñgī

maiñ jāntī huuñ ki tere idrāk meñ nahīñ huuñ

magar vafā kī shabāhatoñ meñ tumheñ milūñgī

ho qaid tum apnī zaat ke ḳhol meñ agarche

bas ek ḳhushbū huuñ dastakoñ meñ tumheñ milūñgī

vo bint-e-havvā ko go nazar se girā rahe haiñ

magar vo kahtī hai rif.atoñ meñ tumheñ milūñgī

nahīñ hai 'shāhīn' ḳhvāb par e'tibār mujh ko

so zindagī kī haqīqatoñ meñ tumheñ milūñgī

gai ruton ki rafaqaton mein tumhein milungi

main chahaton ki riyazaton mein tumhein milungi

tum apni manzil ke raston mein jo dekh pao

to raston ki saubaton mein tumhein milungi

nahin milungi kisi bhi wasl-ashna safar mein

main hijr-mausam ki shiddaton mein tumhein milungi

ki main ne chahat ko bhi aqida bana liya hai

agar mili to aqidaton mein tumhein milungi

main jaanti hun ki tere idrak mein nahin hun

magar wafa ki shabahaton mein tumhein milungi

ho qaid tum apni zat ke KHol mein agarche

bas ek KHushbu hun dastakon mein tumhein milungi

wo bint-e-hawwa ko go nazar se gira rahe hain

magar wo kahti hai rifaton mein tumhein milungi

nahin hai 'shahin' KHwab par e'tibar mujh ko

so zindagi ki haqiqaton mein tumhein milungi