gain yaron se wo agli mulaqaton ki sab rasmen

ga.iiñ yāroñ se vo aglī mulāqātoñ kī sab rasmeñ

paḌā jis din se dil bas meñ tire aur dil ke ham bas meñ

kabhī milnā kabhī rahnā alag mānind mizhgāñ ke

tamāsha kaj-sirishtoñ kā hai kuchh iḳhlās ke bas meñ

tavaqqo kyā ho jiine kī tire bīmār-e-hijrāñ ke

na jumbish nabz meñ jis kī na garmī jis ke malmas meñ

dikhā.e chīra-dastī aah bālādast gar apnī

to maare haath dāmān-e-qayāmat charḳh-e-atlas meñ

jo hai gosha-nashīñ tere ḳhayāl-e-mast-e-abrū meñ

vo hai bait-us-sanam meñ bhī to hai baitul-muqaddas meñ

kare lab-āshnā harf-e-shikāyat se kahāñ ye dam

tire mahzūn-e-be-dam meñ tire maftūn-e-bekas meñ

havā-e-kū-e-jānāñ le uḌe us ko ta.ajjub kyā

tan-e-lāġhar meñ hai jaañ is tarah jis tarah bū ḳhas meñ

mujhe ho kis tarah qaul-o-qasam kā e'tibār un ke

hazāroñ de chuke vo qaul lākhoñ khā chuke qasmeñ

hue sab jam.a mazmūñ 'zauq' dīvān-e-do-ālam ke

havās-e-ḳhamsa haiñ insāñ ke vo band-e-muḳhammas meñ

gain yaron se wo agli mulaqaton ki sab rasmen

paDa jis din se dil bas mein tere aur dil ke hum bas mein

kabhi milna kabhi rahna alag manind mizhgan ke

tamasha kaj-sirishton ka hai kuchh iKHlas ke bas mein

tawaqqo kya ho jine ki tere bimar-e-hijran ke

na jumbish nabz mein jis ki na garmi jis ke malmas mein

dikhae chira-dasti aah baaladast gar apni

to mare hath daman-e-qayamat charKH-e-atlas mein

jo hai gosha-nashin tere KHayal-e-mast-e-abru mein

wo hai bait-us-sanam mein bhi to hai baitul-muqaddas mein

kare lab-ashna harf-e-shikayat se kahan ye dam

tere mahzun-e-be-dam mein tere maftun-e-bekas mein

hawa-e-ku-e-jaanan le uDe us ko tajjub kya

tan-e-laghar mein hai jaan is tarah jis tarah bu KHas mein

mujhe ho kis tarah qaul-o-qasam ka e'tibar un ke

hazaron de chuke wo qaul lakhon kha chuke qasmen

hue sab jama mazmun 'zauq' diwan-e-do-alam ke

hawas-e-KHamsa hain insan ke wo band-e-muKHammas mein