ghair dushman hue yaran-e-watan bhul gae

ġhair dushman hue yārān-e-vatan bhuul ga.e

aap jab se mujhe ai mushfiq-e-man bhuul ga.e

merī fariyād se baat ahl-e-suḳhan bhuul ga.e

zamzame naġhma-sarāyān-e-chaman bhuul ga.e

is qadar gardish-e-taqdīr se ghabrā ga.e ham

sadma-e-kajravī-e-charḳh-e-kuhan bhuul ga.e

kyā kaheñ ranj-e-ġharīb-ul-vatanī kī lazzat

shām-e-ġham dekhte hī sub.h-e-vatan bhuul ga.e

is qadar duur hue ālam-e-arvāh se ham

naam kyā sūrat-e-yārān-e-vatan bhuul ga.e

shab-e-furqat jo ḳhayāl aaya tirī āñkhoñ kā

saare āfāt ba-yak-chashm-zadan bhuul ga.e

ḳhaak meñ sauñpte hī baat na pūchhī afsos

ek hī roz meñ yārān-e-vatan bhuul ga.e

ruḳh-o-qadd-o-badan-o-ġhuncha-lab aisā bhāyā

ki ham ai 'rashk' gul-o-sarv-o-saman bhuul ga.e

ghair dushman hue yaran-e-watan bhul gae

aap jab se mujhe ai mushfiq-e-man bhul gae

meri fariyaad se baat ahl-e-suKHan bhul gae

zamzame naghma-sarayan-e-chaman bhul gae

is qadar gardish-e-taqdir se ghabra gae hum

sadma-e-kajrawi-e-charKH-e-kuhan bhul gae

kya kahen ranj-e-gharib-ul-watani ki lazzat

sham-e-gham dekhte hi subh-e-watan bhul gae

is qadar dur hue aalam-e-arwah se hum

nam kya surat-e-yaran-e-watan bhul gae

shab-e-furqat jo KHayal aaya teri aankhon ka

sare aafat ba-yak-chashm-zadan bhul gae

KHak mein saunpte hi baat na puchhi afsos

ek hi roz mein yaran-e-watan bhul gae

ruKH-o-qadd-o-badan-o-ghuncha-lab aisa bhaya

ki hum ai 'rashk' gul-o-sarw-o-saman bhul gae