ghair ke ghar tu na rah raat ko mehman kahin

ġhair ke ghar tū na rah raat ko mehmān kahīñ

tā nā is baat kā charchā ho mirī jaan kahīñ

ab talak ġhunche kī gardan hai jhukī ḳhajlat se

us ne dekhī thī tirī gūe-girebān kahīñ

rāz-e-dil us se kahā maiñ to vale ye Dar hai

ki mire raaz ko kah de na vo nādān kahīñ

ai pareshānī-e-zulf-e-sanam-e-kāfir-e-kesh

kījiyo tū na mire dil ko pareshān kahīñ

dil kī bechainī se maiñ saḳht ba-tañg aayā huuñ

chain paḌtā hī nahīñ hai ise ik aan kahīñ

dhānī joḌe ne tire khet rakhā hai mujh ko

sabz rañg itne to dekhe nahīñ haiñ dhaan kahīñ

man.a kis vāste kartā hai maiñ tere sadqe

iid ke din to mujhe hone de qurbān kahīñ

dard-e-dil jā ke maiñ kah luuñ abhī dar ke nazdīk

ek saa.at ko hī uTh jaave jo darbān kahīñ

'mus.hafī' ek ġhazal aur bhī maiñ likhtā huuñ

ye to baiteñ ka.ī maiñ ne bahut āsān kahīñ

ghair ke ghar tu na rah raat ko mehman kahin

ta na is baat ka charcha ho meri jaan kahin

ab talak ghunche ki gardan hai jhuki KHajlat se

us ne dekhi thi teri gue-gireban kahin

raaz-e-dil us se kaha main to wale ye Dar hai

ki mere raaz ko kah de na wo nadan kahin

ai pareshani-e-zulf-e-sanam-e-kafir-e-kesh

kijiyo tu na mere dil ko pareshan kahin

dil ki bechaini se main saKHt ba-tang aaya hun

chain paDta hi nahin hai ise ek aan kahin

dhani joDe ne tere khet rakha hai mujh ko

sabz rang itne to dekhe nahin hain dhan kahin

mana kis waste karta hai main tere sadqe

id ke din to mujhe hone de qurban kahin

dard-e-dil ja ke main kah lun abhi dar ke nazdik

ek saat ko hi uTh jawe jo darban kahin

'mushafi' ek ghazal aur bhi main likhta hun

ye to baiten kai main ne bahut aasan kahin