ghair ki bad-gumaniyon pe na ja

ġhair kī bad-gumāniyoñ pe na jā

be-haqīqat kahāniyoñ pe na jā

khīñch letā hai dāman-e-ehsās

phuul kī be-zabāniyoñ pe na jā

us kī ġhārat-garī ko dhyān meñ rakh

aql kī pāsbāniyoñ pe na jā

sabr kī dostī ko rakh malhūz

jabr kī hukmarāniyoñ pe na jā

ḳhubs-e-bātin ke zahr se bhī bach

mahz shīrīñ-bayāniyoñ pe na jā

mustaqil zulm kā mudāvā kar

aarzī mehrbāniyoñ pe na jā

ruuh kī bhī pukār sun 'aḳhtar'

jism kī kāmrāniyoñ pe na jā

ghair ki bad-gumaniyon pe na ja

be-haqiqat kahaniyon pe na ja

khinch leta hai daman-e-ehsas

phul ki be-zabaniyon pe na ja

us ki ghaarat-gari ko dhyan mein rakh

aql ki pasbaniyon pe na ja

sabr ki dosti ko rakh malhuz

jabr ki hukmaraniyon pe na ja

KHubs-e-baatin ke zahr se bhi bach

mahz shirin-bayaniyon pe na ja

mustaqil zulm ka mudawa kar

aarzi mehrbaniyon pe na ja

ruh ki bhi pukar sun 'aKHtar'

jism ki kaamraniyon pe na ja