ghair-mumkin bhi hai mumkin mujhe malum na tha

ġhair-mumkin bhī hai mumkin mujhe ma.alūm na thā

ek din aa.egā ye din mujhe ma.alūm na thā

aur kuchh maiñ tire zāhir se samajhtā thā tujhe

aur kuchh hai tirā bātin mujhe ma.alūm na thā

apne dāmān-e-tasanño.a meñ chhupā sakte haiñ

un ma.ā.ib ko mahāsin mujhe ma.alūm na thā

dushmanī ke liye maḳhsūs hai jo tarz-e-amal

dostī meñ hai vo mumkin mujhe ma.alūm na thā

aah ho saktī hai bedād pe maa.il vo nazar

ho jo altāf kī zāmin mujhe ma.alūm na thā

umr-bhar sabr na aa.egā mujhe jis ke baġhair

chain pā.egā vo mujh bin mujhe ma.alūm na thā

bāhama garmī-e-dil nabz-e-mohabbat ik din

ho ke rah jā.egī sākin mujhe ma.alūm na thā

aah is umr-e-mohabbat meñ kabhī ai 'bismil'

ek din aa.egā ye din mujhe ma.alūm na thā

ghair-mumkin bhi hai mumkin mujhe malum na tha

ek din aaega ye din mujhe malum na tha

aur kuchh main tere zahir se samajhta tha tujhe

aur kuchh hai tera baatin mujhe malum na tha

apne daman-e-tasannoa mein chhupa sakte hain

un maaib ko mahasin mujhe malum na tha

dushmani ke liye maKHsus hai jo tarz-e-amal

dosti mein hai wo mumkin mujhe malum na tha

aah ho sakti hai bedad pe mail wo nazar

ho jo altaf ki zamin mujhe malum na tha

umr-bhar sabr na aaega mujhe jis ke baghair

chain paega wo mujh bin mujhe malum na tha

bahama garmi-e-dil nabz-e-mohabbat ek din

ho ke rah jaegi sakin mujhe malum na tha

aah is umr-e-mohabbat mein kabhi ai 'bismil'

ek din aaega ye din mujhe malum na tha