ghair puchhen bhi to hum kya apna afsana kahen

ġhair pūchheñ bhī to ham kyā apnā afsāna kaheñ

ab to ham vo haiñ jise apne bhī begāna kaheñ

vo bhī vaqt aayā ki dil meñ ye ḳhayāl aane lagā

aaj un se ham ġham-e-daurāñ kā afsāna kaheñ

kyā pukāre jā.eñge ham aise dīvāne vahāñ

hosh-mandoñ ko bhī jis mahfil meñ dīvāna kaheñ

shab ke āḳhir hote hote donoñ hī jab jal bujhe

kis ko samjheñ sham-e-mahfil kis ko parvāna kaheñ

aur kuchh kahnā to gustāḳhī hai shān-e-shaiḳh meñ

haañ magar nā-vāqif-e-ādāb-e-mai-ḳhāna kaheñ

aaj tanhā.ī meñ phir āñkhoñ se Tapkā hai lahū

jī ke bahlāne ko aao apnā afsāna kaheñ

un se raunaq qatl-gah kī un se garmī bazm kī

kahne vaale ahl-e-dil ko laakh dīvāna kaheñ

haiñ baham mauj-e-sharāb o sail-e-ashk o jū-e-ḳhūñ

lā.iq-e-sajda hai jis ko ḳhāk-e-mai-ḳhāna kaheñ

un kī is chīn-e-jabīñ kā kuchh taqāzā ho magar

kyā ġham-e-dil kī haqīqat ko bhī afsāna kaheñ

ghair puchhen bhi to hum kya apna afsana kahen

ab to hum wo hain jise apne bhi begana kahen

wo bhi waqt aaya ki dil mein ye KHayal aane laga

aaj un se hum gham-e-dauran ka afsana kahen

kya pukare jaenge hum aise diwane wahan

hosh-mandon ko bhi jis mahfil mein diwana kahen

shab ke aaKHir hote hote donon hi jab jal bujhe

kis ko samjhen sham-e-mahfil kis ko parwana kahen

aur kuchh kahna to gustaKHi hai shan-e-shaiKH mein

han magar na-waqif-e-adab-e-mai-KHana kahen

aaj tanhai mein phir aankhon se Tapka hai lahu

ji ke bahlane ko aao apna afsana kahen

un se raunaq qatl-gah ki un se garmi bazm ki

kahne wale ahl-e-dil ko lakh diwana kahen

hain baham mauj-e-sharab o sail-e-ashk o ju-e-KHun

laiq-e-sajda hai jis ko KHak-e-mai-KHana kahen

un ki is chin-e-jabin ka kuchh taqaza ho magar

kya gham-e-dil ki haqiqat ko bhi afsana kahen