ghairat-e-ishq salamat thi ana zinda thi

ġhairat-e-ishq salāmat thī anā zinda thī

vo bhī din the ki rah-o-rasm-e-vafā zinda thī

qais ko dosh na do rakhiyo na farhād ko naam

inhī logoñ se mohabbat kī adā zinda thī

shahr-e-bīmār ke har kūcha o baam o dar par

ham bhī marte the ki jab ḳhalq-e-ḳhudā zinda thī

bujh ga.iiñ sham.eñ to dam toḌ ga.e jhoñke bhī

jis tarah zahr-e-raqābat se havā zinda thī

yād-e-ayyām ki sahrā-e-mohabbat meñ 'farāz'

jaras-e-qāfila-e-dil kī sadā zinda thī

ghairat-e-ishq salamat thi ana zinda thi

wo bhi din the ki rah-o-rasm-e-wafa zinda thi

qais ko dosh na do rakhiyo na farhad ko nam

inhi logon se mohabbat ki ada zinda thi

shahr-e-bimar ke har kucha o baam o dar par

hum bhi marte the ki jab KHalq-e-KHuda zinda thi

bujh gain shamen to dam toD gae jhonke bhi

jis tarah zahr-e-raqabat se hawa zinda thi

yaad-e-ayyam ki sahra-e-mohabbat mein 'faraaz'

jaras-e-qafila-e-dil ki sada zinda thi