ghairon ke sath gate jate ho

ġhairoñ ke saath gaate jaate ho

chuTkiyoñ meñ hameñ uḌāte ho

kaun ustād mil gayā kāmil

kis se zarbeñ ye siikh aate ho

naqsh kis kā upar uThā muñh par

ab to naqsha nayā biThāte ho

kabhū so rahte ho dupaTTa taan

kabhī ik taan maar jaate ho

kabhū karte ho jhāñjh aa ham se

kabhī jhāñjh aur daf bajāte ho

kabhū laḌne kā taar hai aur gaah

taar tambūr par chaḌhāte ho

taalī dai thapḌī maar aur laḌ-bhiḌ

thaap murdañg par lagāte ho

hotī hai jab kaheñ se dūt-dapak

kyuuñ hameñ aa ke khaḌkhaḌāte ho

va.ada Taltā hai jab tū raah meñ dekh

buttī de mujh ko giḌgiḌāte ho

'azfarī' dost ko rulā piyāre

dushmanoñ ke ta.iiñ hañsāte ho

ghairon ke sath gate jate ho

chuTkiyon mein hamein uDate ho

kaun ustad mil gaya kaamil

kis se zarben ye sikh aate ho

naqsh kis ka upar uTha munh par

ab to naqsha naya biThate ho

kabhu so rahte ho dupaTTa tan

kabhi ek tan mar jate ho

kabhu karte ho jhanjh aa hum se

kabhi jhanjh aur daf bajate ho

kabhu laDne ka tar hai aur gah

tar tambur par chaDhate ho

tali dai thapDi mar aur laD-bhiD

thap murdang par lagate ho

hoti hai jab kahen se dut-dapak

kyun hamein aa ke khaDkhaDate ho

wada Talta hai jab tu rah mein dekh

butti de mujh ko giDgiDate ho

'azfari' dost ko rula piyare

dushmanon ke tain hansate ho