ghalat batate ho tum salaf ki shujaaten sab

ġhalat batāte ho tum salaf kī shujā.ateñ sab

to aao dariyā meñ ġharq kar deñ hikāyateñ sab

ye sochtā huuñ maiñ paḌh rahā huuñ kitāb kaisī

dhuāñ dhuāñ haiñ laboñ ko chhūkar ibārateñ sab

nizām-e-insāf-o-adl par ye na jaane kaisā zavāl aayā

barahna ho kar sisak rahī haiñ sadāqateñ sab

jo fan ko bakvās kahne vaale sunā.īñ ġhazleñ

giro kahīñ jā ke tum bhī rakh do samā.ateñ sab

chalo ki ham bhī murāja.at ke bahāne DhūñDeñ

yaqīñ ko pāmāl kar chukī haiñ masāfateñ sab

bulandiyoñ ke safar kī mujh ko na daad dījiye

haiñ salb mere dimāġh-o-bāzū kī tāqateñ sab

jo lutf lenā hai mashq-navā.ī kī intihā kā

ubhāro ḳhud meñ mire qabīle kī ādateñ sab

ye kis ne un ko qalam kā apne hadaf banāyā

vaqār khone lagī haiñ 'aslam' alāmateñ sab

ghalat batate ho tum salaf ki shujaaten sab

to aao dariya mein gharq kar den hikayaten sab

ye sochta hun main paDh raha hun kitab kaisi

dhuan dhuan hain labon ko chhukar ibaraten sab

nizam-e-insaf-o-adl par ye na jaane kaisa zawal aaya

barahna ho kar sisak rahi hain sadaqaten sab

jo fan ko bakwas kahne wale sunain ghazlen

giro kahin ja ke tum bhi rakh do samaaten sab

chalo ki hum bhi murajat ke bahane DhunDen

yaqin ko pamal kar chuki hain masafaten sab

bulandiyon ke safar ki mujh ko na dad dijiye

hain salb mere dimagh-o-bazu ki taqaten sab

jo lutf lena hai mashq-nawai ki intiha ka

ubhaaro KHud mein mere qabile ki aadaten sab

ye kis ne un ko qalam ka apne hadaf banaya

waqar khone lagi hain 'aslam' alamaten sab