gale pe ek KHanjar aab-dar kis ka hai

gale pe ik ḳhanjar āb-dār kis kā hai

ye roz roz mirī jaañ pe vaar kis kā hai

hai kaun sāzish-e-gard-o-ġhubār ke pīchhe

pas-e-sumūm-e-junūñ regzār kis kā hai

dhamak-zada haiñ ḳhalāoñ meñ bastiyāñ kis kī

shikasta sar pe makāñ intishār kis kā hai

chamakte rañg khile naqsh ā.īna chehre

to aaj naqsh-e-nazar par ye baar kis kā hai

sarāb-o-dasht zamān-o-makān sab yaksāñ

hameñ bhī dahr meñ ab e'tibār kis kā hai

hai kaun dil kī adā-e-talab se nā-vāqif

baġhair naġhma laraztā hai taar kis kā hai

koī nahīñ hai agar daftar-e-taḳhātub meñ

to phir ye harf ye qaul-o-qarār kis kā hai

palaT ke aa.ī hai maqtal meñ zindagī 'rāhat'

faqīh-e-shahr ko ab intizār kis kā hai

gale pe ek KHanjar aab-dar kis ka hai

ye roz roz meri jaan pe war kis ka hai

hai kaun sazish-e-gard-o-ghubar ke pichhe

pas-e-sumum-e-junun regzar kis ka hai

dhamak-zada hain KHalaon mein bastiyan kis ki

shikasta sar pe makan intishaar kis ka hai

chamakte rang khile naqsh aaina chehre

to aaj naqsh-e-nazar par ye bar kis ka hai

sarab-o-dasht zaman-o-makan sab yaksan

hamein bhi dahr mein ab e'tibar kis ka hai

hai kaun dil ki ada-e-talab se na-waqif

baghair naghma larazta hai tar kis ka hai

koi nahin hai agar daftar-e-taKHatub mein

to phir ye harf ye qaul-o-qarar kis ka hai

palaT ke aai hai maqtal mein zindagi 'rahat'

faqih-e-shahr ko ab intizar kis ka hai