gali gali ki Thokar khai kab se KHwar o pareshan hain

galī galī kī Thokar khaa.ī kab se ḳhvār o pareshāñ haiñ

yaañ apnā hī hosh nahīñ hai kis ko chaah ke armāñ haiñ

fursat ho to aa ke dekho ham āvāra-gardoñ ko

kitne ġhubār haiñ is dāman meñ kitne dil meñ tūfāñ haiñ

sab hī un kā adab karte haiñ chāhne vaalā koī nahīñ

Tokā ik gustāḳh ko lekin ab vo ḳhud hī pashemāñ haiñ

sar jo jhukā us shoḳh ke aage aur kahīñ phir jhuk na sakā

maslak-e-mehr-o-vafā meñ vaa.iz ham kāfir bhī musalmāñ haiñ

kuchh ko mudāvā karnā hogā is āshufta-mizājī kā

ai ġham-e-jānāñ! apne parā.e sab hī tujh se nālāñ haiñ

vaadī o sahrā chhoḌ ke jab se tere shahr meñ aan base

jañgal jañgal DhūñDte phirte ham ko saare ġhazālāñ haiñ

ahl-e-zamāna ko bas merī ik rusvā.ī yaad rahī

varna merī vafā ke jaane kitne aur bhī unvāñ haiñ

ham ne apnī or se ḳhūbāñ kab tum ko bad-nām kiyā

tum ne jo jo daaġh diye haiñ vo chhātī pe numāyāñ haiñ

ḳhair se ab ke ahl-e-sitam ko dīvānoñ se kaam paḌā

dekheñ kitnī zanjīreñ haiñ dekheñ kitne zindāñ haiñ

jo pāmāl-e-ḳhizāñ haiñ ik din ḳhāk-e-chaman se uTTheñge

un kā hashr na jaane kyā ho jo maqtūl-e-bahārāñ haiñ

Dar na rahā mauj-e-balā kā ruḳh bhī phirā duniyā kī havā kā

ronā kyā hai dukh sāgar kā us ke ham par ehsāñ haiñ

ik ik buuñd jalī hai lahū kī tab jā kar ye raat kaTī

tere liye ai sub.h-e-tarab ham kab se chāk-garebāñ haiñ

'mīr' kā tarz apnāyā sab ne lekin ye andāz kahāñ

'āzmī'-sāhib aap kī ġhazleñ sun sun kar sab hairāñ haiñ

gali gali ki Thokar khai kab se KHwar o pareshan hain

yan apna hi hosh nahin hai kis ko chah ke arman hain

fursat ho to aa ke dekho hum aawara-gardon ko

kitne ghubar hain is daman mein kitne dil mein tufan hain

sab hi un ka adab karte hain chahne wala koi nahin

Toka ek gustaKH ko lekin ab wo KHud hi pasheman hain

sar jo jhuka us shoKH ke aage aur kahin phir jhuk na saka

maslak-e-mehr-o-wafa mein waiz hum kafir bhi musalman hain

kuchh ko mudawa karna hoga is aashufta-mizaji ka

ai gham-e-jaanan! apne parae sab hi tujh se nalan hain

wadi o sahra chhoD ke jab se tere shahr mein aan base

jangal jangal DhunDte phirte hum ko sare ghazalan hain

ahl-e-zamana ko bas meri ek ruswai yaad rahi

warna meri wafa ke jaane kitne aur bhi unwan hain

hum ne apni or se KHuban kab tum ko bad-nam kiya

tum ne jo jo dagh diye hain wo chhati pe numayan hain

KHair se ab ke ahl-e-sitam ko diwanon se kaam paDa

dekhen kitni zanjiren hain dekhen kitne zindan hain

jo pamal-e-KHizan hain ek din KHak-e-chaman se uTThenge

un ka hashr na jaane kya ho jo maqtul-e-bahaaran hain

Dar na raha mauj-e-bala ka ruKH bhi phira duniya ki hawa ka

rona kya hai dukh sagar ka us ke hum par ehsan hain

ek ek bund jali hai lahu ki tab ja kar ye raat kaTi

tere liye ai subh-e-tarab hum kab se chaak-gareban hain

'mir' ka tarz apnaya sab ne lekin ye andaz kahan

'azmi'-sahib aap ki ghazlen sun sun kar sab hairan hain