gali mein dard ke purze talash karti thi

galī meñ dard ke purze talāsh kartī thī

mire ḳhutūt ke TukḌe talāsh kartī thī

kahāñ ga.ī vo kuñvārī udaas bī-āpā

jo gaañv gaañv meñ rishte talāsh kartī thī

bhulā.e kaun aziyyat-pasañdiyāñ us kī

ḳhushī ke Dher meñ sadme talāsh kartī thī

ajiib hijr-parastī thī us kī fitrat meñ

shajar ke TūTte patte talāsh kartī thī

qayām kartī thī vo mujh meñ sūfiyoñ kī tarah

udaas ruuh ke goshe talāsh kartī thī

tamām raat ko parde haTā ke chāñd ke saath

jo kho ga.e the vo lamhe talāsh kartī thī

kuchh is liye bhī mire ghar se us ko thī vahshat

yahāñ bhī apne hī pyāre talāsh kartī thī

ghumā-phirā ke judā.ī kī baat kartī thī

hamesha hijr ke harbe talāsh kartī thī

tamām raat vo zaḳhma ke apne poroñ ko

mire vajūd ke reze talāsh kartī thī

duā.eñ kartī thī ujḌe hue mazāroñ par

baḌe ajiib sahāre talāsh kartī thī

mujhe to aaj batāyā hai bādaloñ ne 'vasī'

vo lauT aane ke raste talāsh kartī thī

gali mein dard ke purze talash karti thi

mere KHutut ke TukDe talash karti thi

kahan gai wo kunwari udas bi-apa

jo ganw ganw mein rishte talash karti thi

bhulae kaun aziyyat-pasandiyan us ki

KHushi ke Dher mein sadme talash karti thi

ajib hijr-parasti thi us ki fitrat mein

shajar ke TuTte patte talash karti thi

qayam karti thi wo mujh mein sufiyon ki tarah

udas ruh ke goshe talash karti thi

tamam raat ko parde haTa ke chand ke sath

jo kho gae the wo lamhe talash karti thi

kuchh is liye bhi mere ghar se us ko thi wahshat

yahan bhi apne hi pyare talash karti thi

ghuma-phira ke judai ki baat karti thi

hamesha hijr ke harbe talash karti thi

tamam raat wo zaKHma ke apne poron ko

mere wajud ke reze talash karti thi

duaen karti thi ujDe hue mazaron par

baDe ajib sahaare talash karti thi

mujhe to aaj bataya hai baadalon ne 'wasi'

wo lauT aane ke raste talash karti thi