gali se teri jo ki ai jaan nikla

galī se tirī jo ki ai jaan niklā

garebāñ se dast-o-garebān niklā

tirī aan pe ġhash huuñ har aan zālim

to ik aan lekin na yaañ aan niklā

yahī mujh ko rah rah ke aatā hai armāñ

ki tujh se na kuchh merā armān niklā

mirī āh-e-ātish-fishāñ dekhtī hai

liye ghar se har aan qur.ān niklā

mirī jaan shart-e-rifāqat nahīñ ye

nikal jaan tū bhī ki paikān niklā

kiyā maiñ ne mujrā to jhuñjhlā ke bolā

kahāñ kā mirā jaan pahchān niklā

ajab be-bahā hai mirā ashk yaaro

ye kam-baḳht laḌkā to tūfān niklā

mujhe shaiḳh ulfat se maan.e hai 'ehsāñ'

valī jis ko samjhā thā shaitān niklā

gali se teri jo ki ai jaan nikla

gareban se dast-o-gareban nikla

teri aan pe ghash hun har aan zalim

to ek aan lekin na yan aan nikla

yahi mujh ko rah rah ke aata hai arman

ki tujh se na kuchh mera arman nikla

meri aah-e-atish-fishan dekhti hai

liye ghar se har aan quran nikla

meri jaan shart-e-rifaqat nahin ye

nikal jaan tu bhi ki paikan nikla

kiya main ne mujra to jhunjhla ke bola

kahan ka mera jaan pahchan nikla

ajab be-baha hai mera ashk yaro

ye kam-baKHt laDka to tufan nikla

mujhe shaiKH ulfat se mane hai 'ehsan'

wali jis ko samjha tha shaitan nikla