gham-e-afaq hai ruswa gham-e-dil-bar ban ke

ġham-e-āfāq hai rusvā ġham-e-dil-bar ban ke

tohmat-e-ishq lagī ham pe suḳhan-var ban ke

vo nahīñ maut sahī maut nahīñ niiñd sahī

koī aa jaa.e shab-e-ġham kā muqaddar ban ke

rāhbar tum ko banāyā hameñ mālūm na thā

rāh-rau raah bhaTak jaate haiñ rahbar ban ke

is ziyāñ-ḳhāne meñ ik qatre pe kyā kyā guzrī

kabhī aañsū kabhī shabnam kabhī gauhar ban ke

maut kī niiñd ke mātoñ pe na kyuuñ rashk aa.e

jāgnā hai unheñ hañgāma-e-mahshar ban ke

yaad phir aa ga.iiñ bhūlī huī bāteñ kyā kyā

phir mulāqāt huī aise muqaddar ban ke

aah ye uqda-e-ġham bazm-e-tarab meñ bhī 'hafīz'

bār-hā aañkh chhalak jaatī hai sāġhar ban ke

gham-e-afaq hai ruswa gham-e-dil-bar ban ke

tohmat-e-ishq lagi hum pe suKHan-war ban ke

wo nahin maut sahi maut nahin nind sahi

koi aa jae shab-e-gham ka muqaddar ban ke

rahbar tum ko banaya hamein malum na tha

rah-rau rah bhaTak jate hain rahbar ban ke

is ziyan-KHane mein ek qatre pe kya kya guzri

kabhi aansu kabhi shabnam kabhi gauhar ban ke

maut ki nind ke maton pe na kyun rashk aae

jagna hai unhen hangama-e-mahshar ban ke

yaad phir aa gain bhuli hui baaten kya kya

phir mulaqat hui aise muqaddar ban ke

aah ye uqda-e-gham bazm-e-tarab mein bhi 'hafiz'

bar-ha aankh chhalak jati hai saghar ban ke