gham-e-ashiqi se baDh kar gham-e-zindagi nahin hai

ġham-e-āshiqī se baḌh kar ġham-e-zindagī nahīñ hai

maiñ tire karam ke qurbāñ mujhe kuchh kamī nahīñ hai

mire jān-o-dil ke mālik mujhe be-niyāz-e-ġham kar

kisī aur dar pe hargiz ye jabīñ jhukī nahīñ hai

mire shahr-e-jān-o-dil meñ vo ziyā bikherte haiñ

mirā qalb hai mujallā yahāñ tīrgī nahīñ hai

ai amīr-e-shahr-e-shādāñ mujhe apne paas rakhnā

tire dar se duur rah kar koī zindagī nahīñ hai

vahī chāra-e-vafā hai jahāñ dil ho kār-farmā

jahāñ aql hukmrāñ ho rah-e-āshiqī nahīñ hai

ye hai rāz-e-ishq-o-ulfat na samajh sakegā vaa.iz

jahāñ tīrgī nahīñ hai vahāñ raushnī nahīñ hai

sunī dukh-bharī kahānī mujhe bāryāb kar ke

mire dil meñ ab tamanna koī dūsrī nahīñ hai

gham-e-ashiqi se baDh kar gham-e-zindagi nahin hai

main tere karam ke qurban mujhe kuchh kami nahin hai

mere jaan-o-dil ke malik mujhe be-niyaz-e-gham kar

kisi aur dar pe hargiz ye jabin jhuki nahin hai

mere shahr-e-jaan-o-dil mein wo ziya bikherte hain

mera qalb hai mujalla yahan tirgi nahin hai

ai amir-e-shahr-e-shadan mujhe apne pas rakhna

tere dar se dur rah kar koi zindagi nahin hai

wahi chaara-e-wafa hai jahan dil ho kar-farma

jahan aql hukmran ho rah-e-ashiqi nahin hai

ye hai raaz-e-ishq-o-ulfat na samajh sakega waiz

jahan tirgi nahin hai wahan raushni nahin hai

suni dukh-bhari kahani mujhe baryab kar ke

mere dil mein ab tamanna koi dusri nahin hai