gham-e-bahaar mein rah-e-KHizan se guzre hain

ġham-e-bahār meñ rāh-e-ḳhizāñ se guzre haiñ

diloñ ke qāfile har imtihāñ se guzre haiñ

junūñ kī raushnī le kar nigāhbān-e-hayāt

hudūd-e-zulmat-e-vahm-o-gumāñ se guzre haiñ

charāġh ban ke jale haiñ rah-e-tamannā meñ

bahār ban ke tire gulsitāñ se guzre haiñ

vahāñ nigāh-e-talātum pahuñch nahīñ saktī

sitam-kashoñ ke safīne jahāñ se guzre haiñ

musāfirān-e-haram ko ḳhabar nahīñ ab tak

balā-kashān-e-mohabbat kahāñ se guzre haiñ

tirī talāsh meñ dair-o-haram kā zikr hī kyā

tirī talāsh meñ har āstāñ se guzre haiñ

hameñ to un ke sitam bhī garāñ nahīñ 'fārūq'

mizāj-e-nāz pe shikve garāñ se guzre haiñ

gham-e-bahaar mein rah-e-KHizan se guzre hain

dilon ke qafile har imtihan se guzre hain

junun ki raushni le kar nigahban-e-hayat

hudud-e-zulmat-e-wahm-o-guman se guzre hain

charagh ban ke jale hain rah-e-tamanna mein

bahaar ban ke tere gulsitan se guzre hain

wahan nigah-e-talatum pahunch nahin sakti

sitam-kashon ke safine jahan se guzre hain

musafiran-e-haram ko KHabar nahin ab tak

bala-kashan-e-mohabbat kahan se guzre hain

teri talash mein dair-o-haram ka zikr hi kya

teri talash mein har aastan se guzre hain

hamein to un ke sitam bhi garan nahin 'faruq'

mizaj-e-naz pe shikwe garan se guzre hain