gham-e-dauran bhi nahin hai gham-e-jaanan bhi nahin

ġham-e-daurāñ bhī nahīñ hai ġham-e-jānāñ bhī nahīñ

saḳht mushkil meñ hai ab dil ki ġham-e-jāñ bhī nahīñ

mujh se nārāz haiñ sab jān-o-jahān-o-jānāñ

maiñ ki dil se bhī judā shai huuñ pareshāñ bhī nahīñ

dil ne kuchh aur kahāñ aql ne kuchh aur kahī

sun ke donoñ kī na maanī ki maiñ nādāñ bhī nahīñ

had-e-imkān-e-tasavvur meñ sahī merā surāġh

lekin ai dil mujhe ab DhūñDhnā āsāñ bhī nahīñ

ek vo din ki tirī diid pe qurbāñ thī nigāh

ek ye din ki tire vasl kā armāñ bhī nahīñ

jaane kis ḳhitta-e-aflāk se utrā 'ārif'

jo ik insān kī sūrat bhī hai insāñ bhī nahīñ

gham-e-dauran bhi nahin hai gham-e-jaanan bhi nahin

saKHt mushkil mein hai ab dil ki gham-e-jaan bhi nahin

mujh se naraaz hain sab jaan-o-jahan-o-jaanan

main ki dil se bhi juda shai hun pareshan bhi nahin

dil ne kuchh aur kahan aql ne kuchh aur kahi

sun ke donon ki na mani ki main nadan bhi nahin

had-e-imkan-e-tasawwur mein sahi mera suragh

lekin ai dil mujhe ab DhunDhna aasan bhi nahin

ek wo din ki teri did pe qurban thi nigah

ek ye din ki tere wasl ka arman bhi nahin

jaane kis KHitta-e-aflak se utra 'arif'

jo ek insan ki surat bhi hai insan bhi nahin