gham-e-dauran gham-e-jaanan ka nishan hai ki jo tha

ġham-e-daurāñ ġham-e-jānāñ kā nishāñ hai ki jo thā

vasf-e-ḳhūbāñ ba-hadīs-e-digarāñ hai ki jo thā

lazzat-e-arz-e-vafā rāhat-e-jāñ hai ki jo thī

dil-tapāñ ashk-e-ravāñ shauq-e-javāñ hai ki jo thā

shar'-o-ā.īn kī ta.azīr ke bā-vasf shabāb

lab-o-ruḳhsār kī jānib nigarāñ hai ki jo thā

mere paaoñ se haiñ uljhe hue resham ke se taar

hamdamo ye to vahī band-e-girāñ hai ki jo thā

'ishq kī tarz-e-takallum vahī chup hai ki jo thī

lab-e-ḳhush-gū-e-havas mahv-e-bayāñ hai ki jo thā

rāh-rau dasht meñ fariyād-kunāñ haiñ ki jo thā

ḳhanda-zan qāfila rāh-e-barāñ hai ki jo thā

muġhbache ḳhush haiñ ki bazm un kī hai saaqī un kā

bar-sar-e-kār vahī pīr-e-muġhāñ hai ki jo thā

jalva-e-yār se kyā shikva-e-be-jā kiije

shauq-e-dīdār kā 'ālam vo kahāñ hai ki jo thā

halqa-e-vāz se ab tak hai gurezāñ duniyā

halqa-e-zulf madār-e-do-jahāñ hai ki jo thā

mere hañsne pe ḳhafā the mire rone pe hañse

vahī rañg-e-sitam ishva-girāñ hai ki jo thā

sañg-e-tiflāñ se zarā bach ke rahe qasr-e-buland

ye vahī kār-gah-e-shīsha-garāñ hai ki jo thā

dosto ham-nafaso sunte ho 'ābid' kī ġhazal

ye vahī sho.ala-navā soḳhta-jāñ hai ki jo thā

gham-e-dauran gham-e-jaanan ka nishan hai ki jo tha

wasf-e-KHuban ba-hadis-e-digaran hai ki jo tha

lazzat-e-arz-e-wafa rahat-e-jaan hai ki jo thi

dil-tapan ashk-e-rawan shauq-e-jawan hai ki jo tha

shar'-o-ain ki tazir ke ba-wasf shabab

lab-o-ruKHsar ki jaanib nigaran hai ki jo tha

mere paon se hain uljhe hue resham ke se tar

hamdamo ye to wahi band-e-giran hai ki jo tha

'ishq ki tarz-e-takallum wahi chup hai ki jo thi

lab-e-KHush-gu-e-hawas mahw-e-bayan hai ki jo tha

rah-rau dasht mein fariyaad-kunan hain ki jo tha

KHanda-zan qafila rah-e-baran hai ki jo tha

mughbache KHush hain ki bazm un ki hai saqi un ka

bar-sar-e-kar wahi pir-e-mughan hai ki jo tha

jalwa-e-yar se kya shikwa-e-be-ja kije

shauq-e-didar ka 'alam wo kahan hai ki jo tha

halqa-e-waz se ab tak hai gurezan duniya

halqa-e-zulf madar-e-do-jahan hai ki jo tha

mere hansne pe KHafa the mere rone pe hanse

wahi rang-e-sitam ishwa-giran hai ki jo tha

sang-e-tiflan se zara bach ke rahe qasr-e-buland

ye wahi kar-gah-e-shisha-garan hai ki jo tha

dosto ham-nafaso sunte ho 'abid' ki ghazal

ye wahi shoala-nawa soKHta-jaan hai ki jo tha