gham-e-dil ruKH se ayan ho ye zaruri to nahin

ġham-e-dil ruḳh se ayaañ ho ye zarūrī to nahīñ

ishq rusvā-e-jahāñ ho ye zarūrī to nahīñ

lab pe har-vaqt fuġhāñ ho ye zarūrī to nahīñ

ham-navā dil kī zabāñ ho ye zarūrī to nahīñ

jān-e-tanhā pe guzar jaa.eñ hazāroñ sadme

aañkh se ashk ravāñ ho ye zarūrī to nahīñ

mil hī jā.egī kahīñ DhūñDhne vaale ko bahār

har gulistāñ meñ ḳhizāñ ho ye zarūrī to nahīñ

ham jise apnī zabāñ se bhī na kahne paa.eñ

vo mohabbat kā bayāñ ho ye zarūrī to nahīñ

un kī āñkhoñ meñ chhalak aa.e haiñ aañsū jis se

vo mire dil kā dhuāñ ho ye zarūrī to nahīñ

zabt bhī hotā hai andāz-e-junūñ meñ shāmil

aarzū shola-ba-jāñ ho ye zarūrī to nahīñ

ārzūoñ kī bhī ik bhiiḌ hai shahr-e-dil meñ

hasratoñ kā hī nishāñ ho ye zarūrī to nahīñ

soch kar vādī-e-ulfat meñ qadam rakh 'sāhir'

sirf dil hī kā ziyāñ ho ye zarūrī to nahīñ

gham-e-dil ruKH se ayan ho ye zaruri to nahin

ishq ruswa-e-jahan ho ye zaruri to nahin

lab pe har-waqt fughan ho ye zaruri to nahin

ham-nawa dil ki zaban ho ye zaruri to nahin

jaan-e-tanha pe guzar jaen hazaron sadme

aankh se ashk rawan ho ye zaruri to nahin

mil hi jaegi kahin DhunDhne wale ko bahaar

har gulistan mein KHizan ho ye zaruri to nahin

hum jise apni zaban se bhi na kahne paen

wo mohabbat ka bayan ho ye zaruri to nahin

un ki aankhon mein chhalak aae hain aansu jis se

wo mere dil ka dhuan ho ye zaruri to nahin

zabt bhi hota hai andaz-e-junun mein shamil

aarzu shola-ba-jaan ho ye zaruri to nahin

aarzuon ki bhi ek bhiD hai shahr-e-dil mein

hasraton ka hi nishan ho ye zaruri to nahin

soch kar wadi-e-ulfat mein qadam rakh 'sahir'

sirf dil hi ka ziyan ho ye zaruri to nahin