gham-e-hayat hai fikr-e-maash se logo

ġham-e-hayāt hai fikr-e-ma.āsh se logo

hameñ to sadiyoñ se apnī talāsh hai logo

maiñ pūchhtā nahīñ dair-o-haram ke jhagḌoñ ko

mujhe batāo ye kis kis kī laash hai logo

kisī ke haath meñ haiñ rang-o-nasl ke pate

kisī ke haath meñ maz.hab kā taash hai logo

lahū lahū hai mirī zindagī kā pairāhan

hujūm-e-ġham se jigar pāsh-pāsh hai logo

hamāre dil meñ hai jo kuchh vahī zabān pe hai

hamārā raaz to har ik pe faash hai logo

'umar' ko qatl kiyā hai usī ke bhaa.ī ne

ye hādisa bhī baḌā dil-ḳharāsh hai logo

gham-e-hayat hai fikr-e-maash se logo

hamein to sadiyon se apni talash hai logo

main puchhta nahin dair-o-haram ke jhagDon ko

mujhe batao ye kis kis ki lash hai logo

kisi ke hath mein hain rang-o-nasl ke pate

kisi ke hath mein mazhab ka tash hai logo

lahu lahu hai meri zindagi ka pairahan

hujum-e-gham se jigar pash-pash hai logo

hamare dil mein hai jo kuchh wahi zaban pe hai

hamara raaz to har ek pe fash hai logo

'umar' ko qatl kiya hai usi ke bhai ne

ye hadisa bhi baDa dil-KHarash hai logo