gham-e-jigar-shikan o dard jaan-sitan dekha

ġham-e-jigar-shikan o dard jāñ-sitāñ dekhā

tumhāre ishq meñ kyā kyā na mehrbāñ dekhā

har ek majlis-e-ḳhūbāñ meñ dil-sitāñ dekhā

na koī tujh sā par ai āfat-e-jahāñ dekhā

maiñ vo asiir huuñ jin ne ki dāġh-e-yās sivā

na sair-e-lāla-sitāñ kī na gulsitāñ dekhā

jis aañkh meñ na samātī thī buuñd aañsū kī

ab us ne ġham meñ tire sail-e-ḳhūñ ravāñ dekhā

na kohkan ne vo dekhā kabhī na majnūñ ne

tumhāre ishq meñ jo ham ne ai butāñ dekhā

hazār garche haiñ bīmār terī āñkhoñ ke

par un meñ koī bhalā mujh sā nā-tavāñ dekhā

maiñ vo marīz huuñ pyāre ki jin ne muddat se

sivā-e-dard na ārām yak-zamāñ dekhā

kiyā savāl maiñ 'bedār' se ki ai mahjūr

kabhī bhī tū ne bhalā vasl-e-dil-sitāñ dekhā

mufāriqat hī meñ kyā umr khoī merī tarah

ki ishq meñ dil-e-ġham-ghīñ na shādmāñ dekhā

ye sun ke rone lagā aur ba.ad rone ke

kahā na pūchho jo kuchh maiñ ne ai miyāñ dekhā

firāq-e-yār jafā-e-shamānat-e-a.adā

ġham-e-dil o sitam-e-pand-e-nāsehāñ dekhā

na paa.ī zarra bhī us ashk-e-garm kī tāsīr

na ek dam asar-e-nāla-o-fuġhāñ dekhā

jahāñ meñ vasl hai suntā huuñ muddatoñ se va-lek

sivā-e-nām na us kā kahīñ nishāñ dekhā

gham-e-jigar-shikan o dard jaan-sitan dekha

tumhaare ishq mein kya kya na mehrban dekha

har ek majlis-e-KHuban mein dil-sitan dekha

na koi tujh sa par ai aafat-e-jahan dekha

main wo asir hun jin ne ki dagh-e-yas siwa

na sair-e-lala-sitan ki na gulsitan dekha

jis aankh mein na samati thi bund aansu ki

ab us ne gham mein tere sail-e-KHun rawan dekha

na kohkan ne wo dekha kabhi na majnun ne

tumhaare ishq mein jo hum ne ai butan dekha

hazar garche hain bimar teri aankhon ke

par un mein koi bhala mujh sa na-tawan dekha

main wo mariz hun pyare ki jin ne muddat se

siwa-e-dard na aaram yak-zaman dekha

kiya sawal main 'bedar' se ki ai mahjur

kabhi bhi tu ne bhala wasl-e-dil-sitan dekha

mufariqat hi mein kya umr khoi meri tarah

ki ishq mein dil-e-gham-ghin na shadman dekha

ye sun ke rone laga aur baad rone ke

kaha na puchho jo kuchh main ne ai miyan dekha

firaq-e-yar jafa-e-shamanat-e-ada

gham-e-dil o sitam-e-pand-e-nasehan dekha

na pai zarra bhi us ashk-e-garm ki tasir

na ek dam asar-e-nala-o-fughan dekha

jahan mein wasl hai sunta hun muddaton se wa-lek

siwa-e-nam na us ka kahin nishan dekha