gham-e-mohabbat sata raha hai gham-e-zamana masal raha hai

ġham-e-mohabbat satā rahā hai ġham-e-zamāna masal rahā hai

magar mire din guzar rahe haiñ magar mirā vaqt Tal rahā hai

vo abr aayā vo rañg barse vo kaif jaagā vo jaam khanke

chaman meñ ye kaun aa gayā hai tamām mausam badal rahā hai

mirī javānī ke garm lamhoñ pe Daal de gesuoñ kā saaya

ye dopahar kuchh to mo.atadil ho tamām māhaul jal rahā hai

ye bhīnī bhīnī sī mast ḳhushbū ye halkī halkī sī dil-nashīñ bū

yahīñ kahīñ terī zulf ke paas koī parvāna jal rahā hai

na dekh o mah-jabīñ mirī samt itnī mastī-bharī nazar se

mujhe ye mahsūs ho rahā hai sharāb kā daur chal rahā hai

'adam' ḳharābāt kī sahar hai ki bārgāh-e-rumūz-e-hastī

idhar bhī sūraj nikal rahā hai udhar bhī sūraj nikal rahā hai

gham-e-mohabbat sata raha hai gham-e-zamana masal raha hai

magar mere din guzar rahe hain magar mera waqt Tal raha hai

wo abr aaya wo rang barse wo kaif jaga wo jam khanke

chaman mein ye kaun aa gaya hai tamam mausam badal raha hai

meri jawani ke garm lamhon pe Dal de gesuon ka saya

ye dopahar kuchh to moatadil ho tamam mahaul jal raha hai

ye bhini bhini si mast KHushbu ye halki halki si dil-nashin bu

yahin kahin teri zulf ke pas koi parwana jal raha hai

na dekh o mah-jabin meri samt itni masti-bhari nazar se

mujhe ye mahsus ho raha hai sharab ka daur chal raha hai

'adam' KHarabaat ki sahar hai ki bargah-e-rumuz-e-hasti

idhar bhi suraj nikal raha hai udhar bhi suraj nikal raha hai