gham-e-paiham ki zindagi bhi mili

ġham-e-paiham kī zindagī bhī milī

ġham meñ ik lazzat-e-ḳhafī bhī milī

umr nauha-kunāñ rahī saarī

isī nauhe meñ naġhmagī bhī milī

ġharfashīñ shorisheñ guhār dahāḌ

isī jañgal meñ simfanī bhī milī

ghup añdheroñ kī rahguzāroñ meñ

kabhī chhan-chhan ke chāñdnī bhī milī

ik-na-ik rāsta to sab kā hai

ye na pūchho ki rāstī bhī milī

yuuñ bhī kyā kam the rah-zanān-e-havās

raah meñ bīsvīñ sadī bhī milī

us añdhere kā shukriya jis meñ

ham jo Duube to raushnī bhī milī

ham ne māñgī shaguftagī paa.ī

be-talab phir fasurdagī bhī milī

umr-bhar qist qist marte rahe

mar chuke jab to zindagī bhī milī

gham-e-paiham ki zindagi bhi mili

gham mein ek lazzat-e-KHafi bhi mili

umr nauha-kunan rahi sari

isi nauhe mein naghmagi bhi mili

gharfashin shorishen guhaar dahaD

isi jangal mein simfani bhi mili

ghup andheron ki rahguzaron mein

kabhi chhan-chhan ke chandni bhi mili

ik-na-ik rasta to sab ka hai

ye na puchho ki rasti bhi mili

yun bhi kya kam the rah-zanan-e-hawas

rah mein biswin sadi bhi mili

us andhere ka shukriya jis mein

hum jo Dube to raushni bhi mili

hum ne mangi shaguftagi pai

be-talab phir fasurdagi bhi mili

umr-bhar qist qist marte rahe

mar chuke jab to zindagi bhi mili