gham-e-ulfat mere chehre se ayan kyun na hua

ġham-e-ulfat mire chehre se ayaañ kyuuñ na huā

aag jab dil meñ sulagtī thī dhuāñ kyuuñ na huā

sail-e-ġham ruktā nahīñ zabt kī dīvāroñ se

josh-e-girya thā to maiñ girya-kunāñ kyuuñ na huā

kahte haiñ husn ḳhad-o-ḳhāl kā pāband nahīñ

har hasīñ shai pe mujhe terā gumāñ kyuuñ na huā

dasht bhī is ke makīñ shahr bhī is meñ ābād

tū jahāñ aan base dil vo makāñ kyuuñ na huā

ye samajhte hue maqsūd-e-nazar hai tū hī

maiñ tire husn kī jānib nigarāñ kyuuñ na huā

is se pahle ki tire lams kī ḳhushbū kho jaa.e

tujh ko pā lene kā armān javāñ kyuuñ na huā

tapte sahrā to mirī manzil-e-maqsūd na the

maiñ kahīñ ham-safar-e-abr-e-ravāñ kyuuñ na huā

ajnabī par to yahāñ lutf sivā hotā hai

maiñ bhī is shahr meñ benām-o-nishāñ kyuuñ na huā

nā-rasā.ī thī mire shauq kā hāsil to 'shakeb'

hā.il-e-rāh koī sañg-e-girāñ kyuuñ na huā

gham-e-ulfat mere chehre se ayan kyun na hua

aag jab dil mein sulagti thi dhuan kyun na hua

sail-e-gham rukta nahin zabt ki diwaron se

josh-e-girya tha to main girya-kunan kyun na hua

kahte hain husn KHad-o-KHal ka paband nahin

har hasin shai pe mujhe tera guman kyun na hua

dasht bhi is ke makin shahr bhi is mein aabaad

tu jahan aan base dil wo makan kyun na hua

ye samajhte hue maqsud-e-nazar hai tu hi

main tere husn ki jaanib nigaran kyun na hua

is se pahle ki tere lams ki KHushbu kho jae

tujh ko pa lene ka arman jawan kyun na hua

tapte sahra to meri manzil-e-maqsud na the

main kahin ham-safar-e-abr-e-rawan kyun na hua

ajnabi par to yahan lutf siwa hota hai

main bhi is shahr mein benam-o-nishan kyun na hua

na-rasai thi mere shauq ka hasil to 'shakeb'

hail-e-rah koi sang-e-giran kyun na hua