gham kaisa koi humse jo begana rahega

ġham kaisā koī ham se jo begāna rahegā

dīvāna to har haal meñ dīvāna rahegā

ka.aba hī rahegā na sanam-ḳhāna rahegā

jab tak ki nazar meñ dar-e-jānāñ na rahegā

haañ maiñ ne bahut naqsh-e-vafā chhoḌ diye haiñ

jab maiñ na rahūñgā mirā afsāna rahegā

aayā huuñ tirī bazm se lekin nahīñ aayā

har-vaqt tasavvur meñ parī-ḳhāna rahegā

kaifiyyat-e-sad-sāġhar-e-mai shoḳhī-e-raftār

saaqī hai salāmat to ye mai-ḳhāna rahegā

mai-ḳhāna sahī kuchh bhī yahīñ dil ko sukūñ hai

apnā to yahī mashrab-e-rindāna rahegā

taufīq-e-alam dekh ke ġham dījiye mujh ko

kyā hogā agar zabt kā yaarā na rahegā

jab tak hai 'razā' pīr-e-muġhāñ se mujhe nisbat

gardish meñ isī tarah se paimāna rahegā

gham kaisa koi hum se jo begana rahega

diwana to har haal mein diwana rahega

kaba hi rahega na sanam-KHana rahega

jab tak ki nazar mein dar-e-jaanan na rahega

han main ne bahut naqsh-e-wafa chhoD diye hain

jab main na rahunga mera afsana rahega

aaya hun teri bazm se lekin nahin aaya

har-waqt tasawwur mein pari-KHana rahega

kaifiyyat-e-sad-saghar-e-mai shoKHi-e-raftar

saqi hai salamat to ye mai-KHana rahega

mai-KHana sahi kuchh bhi yahin dil ko sukun hai

apna to yahi mashrab-e-rindana rahega

taufiq-e-alam dekh ke gham dijiye mujh ko

kya hoga agar zabt ka yara na rahega

jab tak hai 'raza' pir-e-mughan se mujhe nisbat

gardish mein isi tarah se paimana rahega