gham kam hain zindagi mein zara aur paliye

ġham kam haiñ zindagī meñ zarā aur pāliye

jo mas.ale nahīñ haiñ unheñ bhī uchhāliye

ik laġhzish-e-qadam bhī kabhī sar uḌā ga.ī

dastār chhoḌ dījiye ḳhud ko sañbāliye

bas haath terā haath meñ aa ne kī der thī

sab mehr-o-māh-o-arz-o-samā ham ne pā liye

raahī ye sañg-e-mīl nahīñ sañg-e-rāh haiñ

but bas ga.e haiñ ka.aba-e-dil meñ nikāliye

ab ke hameñ ishāra-e-anjum na thā koī

khīñche zamīñ ne haath to lañgar uThā liye

sarsabz dasht ḳhauf se ḳhāshāk ho gayā

haiñ mish.aleñ huzūr meñ armāñ nikāliye

gham kam hain zindagi mein zara aur paliye

jo masale nahin hain unhen bhi uchhaaliye

ek laghzish-e-qadam bhi kabhi sar uDa gai

dastar chhoD dijiye KHud ko sanbaaliye

bas hath tera hath mein aa ne ki der thi

sab mehr-o-mah-o-arz-o-sama hum ne pa liye

rahi ye sang-e-mil nahin sang-e-rah hain

but bas gae hain kaba-e-dil mein nikaliye

ab ke hamein ishaara-e-anjum na tha koi

khinche zamin ne hath to langar uTha liye

sarsabz dasht KHauf se KHashak ho gaya

hain mishalen huzur mein arman nikaliye