غم کے ماروں کی اگر آنکھ سے آنسو نکلے

غم کے ماروں کی اگر آنکھ سے آنسو نکلے

عین ممکن ہے کہ تذلیل کا پہلو نکلے

گل سے خوشبو کا نکلنا تو کوئی بات نہیں

بات تو جب ہے کسی سنگ سے خوشبو نکلے

کوئی بسمل کوئی مقتول نظر آئے گا

اپنے شانوں پہ وہ بکھرا کے جو گیسو نکلے

میری محرومیاں ڈس لیں گی یقیناً تجھ کو

اپنی خوشیوں کے جزیروں سے اگر تو نکلے

عقل کہتی ہے کہ اب دور ہی رہئے ان سے

دل یہ کہتا ہے ملاقات کا پہلو نکلے

شام غم کس کی تمنا کا جنازہ تابشؔ

اپنے کاندھوں پر اٹھائے ہوئے جگنو نکلے