gham mein ek mauj sarKHushi ki hai

ġham meñ ik mauj sarḳhushī kī hai

ibtidā sī ḳhud āgahī kī hai

kise samjhā.eñ kaun mānegā

jaise mar mar ke zindagī kī hai

bujhīñ sham.eñ to dil jalā.e haiñ

yuuñ añdheroñ meñ raushnī kī hai

phir jo huuñ us ke dar pe nāsiya sā

maiñ ne ai dil tirī ḳhushī kī hai

maiñ kahāñ aur dayār-e-ishq kahāñ

ġham-e-daurāñ ne rahbarī kī hai

aur umDe haiñ aañkh meñ aañsū

jab kabhī us ne dil-dahī kī hai

qaid hai aur qaid-e-be-zanjīr

zulf ne kyā fusūñ-garī kī hai

maiñ shikār-e-itāb hī to nahīñ

mehrbāñ ho ke baat bhī kī hai

bazm meñ us kī baar paane ko

dushmanoñ se bhī dostī kī hai

un ko nazreñ bachā ke dekhā hai

ḳhuub chhup chhup ke mai-kashī kī hai

har taqāzā-e-lutf par us ne

taaza rasm-e-sitamgarī kī hai

gham mein ek mauj sarKHushi ki hai

ibtida si KHud aagahi ki hai

kise samjhaen kaun manega

jaise mar mar ke zindagi ki hai

bujhin shamen to dil jalae hain

yun andheron mein raushni ki hai

phir jo hun us ke dar pe nasiya sa

main ne ai dil teri KHushi ki hai

main kahan aur dayar-e-ishq kahan

gham-e-dauran ne rahbari ki hai

aur umDe hain aankh mein aansu

jab kabhi us ne dil-dahi ki hai

qaid hai aur qaid-e-be-zanjir

zulf ne kya fusun-gari ki hai

main shikar-e-itab hi to nahin

mehrban ho ke baat bhi ki hai

bazm mein us ki bar pane ko

dushmanon se bhi dosti ki hai

un ko nazren bacha ke dekha hai

KHub chhup chhup ke mai-kashi ki hai

har taqaza-e-lutf par us ne

taza rasm-e-sitamgari ki hai