غم نہیں ہوتا ہے آزادوں کو بیش از یک نفس (ردیف .. م)

غم نہیں ہوتا ہے آزادوں کو بیش از یک نفس

برق سے کرتے ہیں روشن شمع ماتم خانہ ہم

محفلیں برہم کرے ہے گنجفہ باز خیال

ہیں ورق گردانیٔ نیرنگ یک بت خانہ ہم ہم

باوجود یک جہاں ہنگامہ پیدائی نہیں

ہیں چراغان شبستان دل پروانہ ہم

ضعف سے ہے نے قناعت سے یہ ترک جستجو

ہیں وبال تکیہ گاۂ ہمت مردانہ ہم

دائم الحبس اس میں ہیں لاکھوں تمنائیں اسدؔ

جانتے ہیں سینۂ پر خوں کو زنداں خانہ ہم

بسکہ ہیں بد مست بشکن بشکن مے خانہ ہم

موئے شیشہ کو سمجھتے ہیں خط پیمانہ ہم

بسکہ ہر یک موئے زلف افشاں سے ہے تار شعاع

پنجۂ خورشید کو سمجھے ہیں دست شانہ ہم

ہے فروغ ماہ سے ہر موج اک تصویر چاک

سیل سے فرش کتاں کرتے ہیں تا ویرانہ ہم

مشق از خود رفتگی سے ہیں بہ گلزار خیال

آشنا تعبیر خواب سبزۂ بیگانہ ہم

فرط بے خوابی سے ہیں شب ہاۓ ہجر یار میں

جوں زبان شمع داغ گرمی افسانہ ہم

جانتے ہیں جوشش سودائے زلف یار میں

سنبل بالیدہ کو موئے سر دیوانہ ہم

بسکہ وہ چشم و چراغ محفل اغیار ہے

چپکے چپکے جلتے ہیں جوں شمع ماتم خانہ ہم

شام غم میں سوز عشق آتش رخسار سے

پر فشان سوختن ہیں صورت پروانہ ہم

رہتے ہیں افسردگی سے سخت بیدردانہ ہم

شعلہ ہا نذر سمندر بلکہ آتش خانہ ہم

حسرت عرض تمنا یاں سے سمجھا چاہیے

دو جہاں حشر زبان خشک ہیں جوں شانہ ہم

کشتی عالم بہ طوفان تغافل دے کہ ہیں

عالم آب گداز جوہر افسانہ ہم

وحشت بے ربطی پیچ و خم ہستی نہ پوچھ

ننگ بالیدن ہیں جوں موئے سر دیوانہ ہم